احتفل صانع المحتوى السوري سليمان عاجي بزواجه من الشابة فاتنة عبد الله داخل قلعة دمشق، بحضور لافت من أصدقائهما المقربين، وعدد من صناع المحتوى.
وطغت على الحفل المشاعر الصادقة ورسائل المحبة والتهاني من القلب، التي قدّمها الحاضرون للعروسين، متمنين لهما بداية موفقة لحياة زوجية عنوانها التفاهم والمودة.
الزوجان شاركا فرحتهما مع الجمهور بعبارات عفوية، وقالا معًا: الحمد لله.. شكرًا لكل اللي عم يشارك بفرحتنا اليوم.
لمى الرهونجي: الزواج شركة... والاتفاق أساس النجاح
قدّمت صانعة المحتوى لمى الرهونجي تهنئتها للعروسين بأمنيات صادقة، قائلة: ألف مبروك والله يتمملكم على خير، كما وجّهت نصيحة بسيطة وواقعية، معتبرة أن: الزواج هو شراكة، ولازم يكونوا متفقين لحتى تنجح.
من جانبه، عبّر الفنان يزن السيد عن سعادته بزفاف سليمان وفاتنة، متمنيًا لهما حياة مليئة بالتفاهم، وقال: ألف مبروك والله يتمملكن على خير، وأضاف: الزواج بده تكبير عقل، وتفهم، وتقبل بكل الظروف.. هو مو بس شهر عسل وضحك وفرح... هو مشاركة بكل شي.
عمار البواب: كل تأجيل فيه خير... وعيشوا كأنكم رفقات
أما صانع المحتوى عمار البواب فعبّر عن فرحته الكبيرة قائلًا: أول شي ألف مبروك، وإن شاء الله يوفقكم وسنينكم كلها سعادة ونجاحات. كل التأجيل اللي صار كان لخير، اليوم رح نحتفل وننبسط وندبك ونعوض عن كل شي، وأضاف موجهًا نصيحة للعروسين: خليكم رفقات متزوجين... شاركها كل شي، لا تخبي عنها شي. الحب والمودة لازم يضلوا موجودين.
شادي قاسو: انبسطوا وعيشوا اللحظة
صانع المحتوى شادي قاسو اختار أن تكون تهنئته للعروسين من القلب، وقال: إن شاء الله ألف مبروك، يا رب نشوف ولادهم عن قريب، وفي نصيحته، اختصر كل شيء بجملة محبة: عيشوا يومكم، وانبسطوا، وخلي الفرح رفيق أيامكن.
وبأسلوبه الطريف، علّق صديق العروسين إيدي على الزفاف قائلًا: الزواج الناجح بدو مجانين... خليك مجنون، لا تعقل، إذا عقلت راحت عليك!، ومازح فاتنة موجهًا لها نصيحة خاصة: اتحملي جنانو اللي بدو يجنو، منشان تعيشوا سوا... ما في غير هيك.
رفاه عاجي: ما شفت أخي سعيد هيك بحياته
شقيقة العريس، رفاه عاجي، لم تتمالك دموعها وهي تتحدث عن فرحتها بزفاف شقيقها، فقالت بتأثر: كتير فرحانين فوق الوصف، لأنه يمكن هذا حب الطفولة... ربينا سوا، وزعلنا سوا.. فالفرحة ما كانت مجرد إنها زوجة أخي، بل كانت مع فاتنة أيضًا.. قبل ما تصير مرت أخي، هي البيست فريند تبعي فعليًا.
والدة سليمان: أحلى فرحة بالدنيا
أما والدة سليمان، فعبّرت عن مشاعر الأم التي ترى ابنها عريسًا، فقالت: أحلى فرحة بالدنيا كلها، رب العالمين كرمني ببنت الحلال. ما في أحلى من هاللحظة إني شوفه عريس. وإذا بتدخل لقلبي، ما حتعرف الفرحة يلي حاسة فيها.
سليمان وفاتنة: الحرية والصبر أساس العلاقة
العريس سليمان عاجي تحدث عن أبرز نصيحة سمعها حول الزواج، فقال: ما نأسر حرية بعض. أكيد إيه، لأنه أنا كمان كثير بحب هالشي... إنه نضل كل واحد عنده مساحته حتى لو كنا ببيت واحد.
أما العروس فاتنة عبد الله، فاختصرت تجربتها مع سليمان بعبارة صريحة قالتها بابتسامة: بدو صبر كثير... وخصوصًا مع شخص مثل سليمان.
