شهدت سينما "زاوية" بالقاهرة مساء الخميس، عرضًا خاصًا للفيلم القصير "إن شالله الدنيا تتهد"، بطولة الفنانة سلمى أبو ضيف، بعد مشاركته في عدد من المهرجانات الدولية. وخلال الفعالية، تحدث صناع العمل لـ"فوشيا" عن كواليسه ورسائله وأهمية دعم الأفلام القصيرة.
سلمى أبو ضيف: الفيلم القصير يملك نفس أهمية الطويل
في تصريحات لكاميرا "فوشيا"، عبّرت سلمى أبو ضيف عن حماسها للمشاركة في الفيلم، قائلة: الفيلم القصير ممكن يكون له نفس الأهمية كفيلم طويل، الفيلم بيقدم رسالة والمهم وصلت ولا لأ، وأنا طول عمري كان نفسي أعمل فيلم قصير وعندما عُرض عليّ كان عندي تحمس بشكل مش عادي.
وعمّا إذا كانت البطولة النسائية هي دافعها لقبول العمل، أوضحت: ممكن يجيلي بطولة نسائية لكن الفيلم نفسه مش حلو، والواحد ساعتها مش هيقبله. قصة الفيلم لمستني أنا وطول عمري كنت بسأل أسئلة لو حصل كده هنعمل إيه.
مخرج الفيلم يكشف كواليس "إن شالله الدنيا تتهد"
من جانبه، عبّر مخرج العمل كريم شعبان عن سعادته الكبيرة بعرض الفيلم في سينما "زاوية"، وقال: دي لحظة كبيرة أوي إن الناس تشوف الفيلم وتتفرج عليه. أنا ممتن جدًا لفيلم 6 أيام وفيلم إن شالله الدنيا تتهد، الفيلمين دول ساعدوني أتشكل كمخرج وإن شاء الله الأفلام اللي جاية كمان. أنا مترقب جدًا رأي الجمهور المصري، لأن ده أهلي وناسي ودي حاجة بفتخر بيها وأتشرف بيها، وأتمنى الفيلم ينال إعجابهم.
طارق الشناوي: اتجاه حميد لعرض الأفلام القصيرة
بدوره، عبّر الناقد الفني طارق الشناوي، عن تقديره للتجربة، مؤكدًا أهمية عرض الأفلام القصيرة في مصر، وقال: سعيد بالتجربة إن بقى في أفلام قصيرة نعرضها في مصر، لأن دي الأفلام الحقيقة بنعاملها بقسوة وبنغفل أهميتها، ولما تتعرض في سينما لها جمهورها زي سينما زاوية ده اتجاه حميد.
