علقت الفنانة ليلى زاهر على حالة الجدل التي أثارتها حلقتها مع زوجها الفنان والمنتج هشام جمال، في برنامج ABtalks مع الإعلامي أنس بوخش، موضحة حقيقة عدد من المواقف التي تم تداولها من الحلقة، ومؤكدة أن أجزاء من الحوار تم اقتطاعها وفهمها بمعانٍ مختلفة عن المقصود.
ليلى زاهر ترد على جدل حلقة ABtalks
كتبت ليلى زاهر عبر حسابها الرسمي في منصة "إنستغرام": بحترم وبقدر ردود الأفعال واهتمامكم بس حابة أوضح كام نقطة لأن في أجزاء من الحلقة اتقطعت واتاخدت بمعاني غلط. تصوير حلقة AB Talks حصل وأنا في أواخر شهور الحمل، قبل التصوير إدارة أعمالنا بلغت فريق البرنامج إننا هنوصل متأخر لاني تعبت شوية، ولما وصلنا اعتذرنا لأنس وفريق البرنامج بالكامل على التأخير.
وأضافت: واحنا داخلين الاستديو قلت لهشام إني لسه تعبانة وطلبت منه يساعد أكثر في إدارة الحوار لاني كنت تعبانة ولان طاقتي بشكل عام أقل الفترة دي، وده شيء طبيعي.
ليلى زاهر تكشف تفاصيل موقف السفر مع هشام جمال
عن موقف السفر الذي تم تداوله من الحلقة، قالت ليلى زاهر: موقف السفر حصل فعلًا! لكن بعدها لوحده اتكلم معايا وقالي إنه انتبه إنه تصرف غلط بحكم طريقة نشأة شباب كتير، وإنه نوع تصرفات محتاج تصحيح وعلاج، وده كان تكملة كلامه الموجود في الحلقة الكاملة. والحقيقة إن من يومها محصلش موقف مشابه، وفكرة إن راجل ياخد باله ويحلل ويصارح بالمشكلة ويتغير عشانك هو أكيد شيء يحترم.
ليلى زاهر: أنا اخترتك وأنا كمان اخترته
تطرقت ليلى زاهر إلى الجدل حول حديثها عن اختيارها لهشام جمال، موضحة سبب إطلاق هذه العبارة خلال الحلقة، وقالت: أنا اخترتك! وأنا كمان اخترته.. لأن كثير من أسبابنا متشابهة. أكيد بحبه عشان طريقة تعامله معايا وكمان تعاملاته في حياته ومع الناس، وأكيد عشان شايفاه الأحسن والانسب والاحلى في كل حاجة. وسبب ذكر الجملة دي في الحلقة هو نقاش عن الغيرة، وإنه كان بيأكدلي هو ليه عمره ما يشوف واحدة أحسن مني، مش لأنه بيشرح بطريقة متعالية زي ما الجزء اللي نزل كان بيتكتب عليه.
ليلى زاهر تكشف مدة علاقتها بهشام جمال
أوضحت ليلى زاهر تفاصيل علاقتها بزوجها هشام جمال، قائلة: علاقتي بهشام بدأت من 4 سنين، وبقالنا حوالي سنة ونص متجوزين وأنا أكثر واحدة عارفة تفاصيل علاقتنا وحياتنا واتفاقاتنا اللي بنحترمها وبتمشي علينا احنا الاتنين. لكن كمان أنا عندي أمي وجدتين واخوات وصديقات قريبين مني جدا، كلهم سيدات بخبرات مختلفة شايفين علاقتنا من قريب وعايشين تفاصيل كثير منها، وكلهم بيحترموه وبيحبوه وبيدعولنا نكمل بنفس التفاهم اللي إحنا فيه.
ليلى زاهر: هشام جمال لم يتركني في فترة الحمل
تحدثت ليلى زاهر عن دعم هشام جمال لها خلال فترة الحمل، قائلة: أنا بتكلم عن شخص من يوم فرحنا لحد النهارده كل أيامي معاه حلوة، بيعاملني بكل حب واحترام وتقدير. شخص من أول يوم في حملي مسابنيش في تعب، ولا سفر لشغلي، ولا زيارة دكتور، لأنه حاططني أولوية في حياته وقدر يحتويني بتغيرات مشاعري وأحاسيسي خلال تجربة جديدة علينا احنا الاثنين.
ليلى زاهر: عدينا أول مرحلة من الجواز بحب وتفاهم
أضافت: أنا أقدر أحكم على اللي أنا عايشاه حاليا.. وهو إننا عدينا أول مرحلة من الجواز بيتقال عليها من أصعب المراحل، بحب وتفاهم، وأتمنى نكمل كده وأحسن إن شاء الله. بعيدًا عن التنبؤات المتشائمة المتأثرة بانتشار العلاقات السامة، واللي هيلاقوا دايما زاوية تقلب أو تحور أي شيء إيجابي لسلبي، حتى الكلام اللي أنا بكتبه دلوقتي.
ليلى زاهر تطلب الدعاء لها ولزوجها
اختتمت ليلى زاهر رسالتها قائلة: ربنا يكتب لكل حد السعادة والراحة في حياته بطريقته، وإن شاء الله تشوفونا بعد سنين أكثر، ونكون مبسوطين ومتفاهمين أكثر، وأقدر أنا كمان أخليه سعيد قد ما هو بيخليني مبسوطة في حياتي. أخيرا هطلب دعواتكم لينا واحنا بنعيش واحدة من أسعد مراحل حياتنا، وبنستعد نستقبل أول مولودة لينا إن شاء الله.
