ريهام عبد الغفور: أتمنى تقديم شخصية مريضة نفسيا.. وكلبي كان ملاكي الحارس

كشفت الفنانة المصرية ريهام عبد الغفور، عن رغبتها بتقديم شخصية تُعاني من مرض نفسي أو عقلي في عمل درامي، نظرا لحرصها على الانغماس بتفاصيل الدور، وتقديمه بجهد واضح حسب تعبيرها.

وقالت عبد الغفور خلال لقائها مع برنامج "مساء dmc" إنه عُرض عليها خلال هذه السنة أدوار مختلفة ومتباينة، وهي بدورها لم ترفض أي عمل؛ لأنها تعتبر ذلك "إنجاز وحصل"، مشيرة إلى أنها تركز في الشخصية ليصدقها الجمهور، لذلك لم تضع "الميك اب" في "منعطف خطر".

وحول دورها في "أزمة منتصف العمر" قالت: "مبعملش حاجة غير وأنا مقتنعة بيها، ودور فيروز مقتنعة بيه جدا وبحبه جدا وعارفة أنا بعمل ايه كويس وكنت عارفة ان بقدم حاجة شخصيات غلطت وبعدها حياتهم تدمرت، ولازم تفكري كويس في تصرفاتك وفيروز من أكتر الأدوار اللي حبيتها".

وتابعت ريهام عبد الغفور: "أنا راضية عن نفسي جدا وعن أعمالي، بخاف كل مرة لأن كل ما الناس بتعجب بحاجة بحس بمسؤولية أكتر وبحس اني مش عايزة اخذلهم فبفكر وبحاول وببقى مخوضة أكتر، هي شغلانة متعبة للأعصاب شوية بس بحاول وبعمل اللي بقدر عليه، ولو لقيت دور شبه حاجة عملتها برفضها عشان ببقى عايزة أعمل حاجة جديدة".

دخول ابنها المجال الفني

وحول دخول نجلها الوسط الفني، قالت: "ابني الكبير دارس تصوير سينمائي، ودخل مجال الفن وتخصص في التصوير، وولادي مش بيخافوا مني، ولكن بيخافوا على زعلي.. وأنا بخاف على زعل والدتي جدا".

وأضافت: "بحب أولادي أوي وعلاقتي فيهم قريبة، إحنا صحاب وبنتكلم في كل حاجة متفاهمين جدا، وابني الكبير دخل المجال، والصغير علاقتي فيه كويسة وببقى عايزة أكون صحبتهم أكتر من أي حاجة".

وتحدثت ريهام عن والدها الفنان أشرف عبد الغفور، لافتة: "أسسني صح، وفهمني الحجات اللي أنا مؤمنة فيها وإن الواحد مش هيسيب غير سيرة، وليه تأثير عليا فنيا وانسانيا".

أما عن أصدقائها، فقد أوضحت عبد الغفور: "صحابي خارج الوسط الفني، وحنان مطاوع من الوسط الفني ومنى زكي ومنة شلبي وبسمة وياسمين عبد العزيز، وحنان الأقرب، وخارج الوسط هما صحابي الأكتر منهم رانيا السيد وبوسي صديقة عمري، عندي أصحاب كتيرة جدا وأنا من الناس المحظوظة اللي عندي أصحاب كتير".

وفاة كلبها

وأعربت ريهام عبدالغفور عن تأثرها العميق لوفاة كلبها، قائلة: "كلبي كان عنده 5 سنين وكان قريب مني ومش مجرد كلب زي ملاك حارس بيحس بيا لما كنت بتعب في اللوكشين كان هو بيتنطط في البيت، وخدت كمية تريقة من الناس بعد ما نزلت الصورة وكنت مستغربة جدا ان الناس بتحكم على مشاعر البني أدم".

كما كشفت عن تأثرها من التعليقات السلبية على السوشال ميديا، وقالت: "ساعات بتأثر لما الحاجات بيدخلوا فيها أهلي أو أولادي، في ناس بيبقوا قاصدين يضايقوا الشخص".

مسلسل "الأصلي"

وأعربت ريهام عبد الغفور عن سعادتها بنجاح مسلسلها "الأصلي"، نظرا لما تلقته من ردود فعل إيجابية من الجمهور.

وتحدثت عن شخصيتها في المسلسل قائلة: "فاطمة الأصلي مش شريرة هي قوية وشايفه إن رأيها هو الصح، هي شخصية قوية وعنيدة، وبحب أفاجئ الجمهور، وشغلي إني أدور على شغل مختلف وأفاجئ الجمهور، ويكون تحدي بالنسبالي".