عزيز الشافعي يحكي كواليس عودة شيرين: طلبت أغنية دراما
تحدث الشاعر والملحن عزيز الشافعي عن جملة من الأسرار التي تتعلق بأعماله الناجحة مع أكبر نجوم الغناء في مصر والعالم العربي، وكواليس الهجوم القاسي عليه بعد أغنية "بحرية"، معتبرا أن ما حدث كان بمثابة "حملة ممنهجة" ضده.
ماذا قال عزيز الشافعي عن عودة شيرين بعد غياب؟
حكى الشافعي، خلال استضافته في برنامج "صاحبة السعادة" مع النجمة إسعاد يونس، كواليس عودة النجمة الكبيرة شيرين عبد الوهاب للغناء بعد فترة توقف شهدت مرورها بأزمة صحية ونفسية.
وقال الشاعر المصري: شيرين كلمتني بعد المرحلة الصعبة اللي مرت بيها، وقالتلي يلا بينا، أنا نفسي مفتوحة وعايزة أنزل كل أسبوع أغنية، فاتقابلنا مع بعض وفكرنا وقعدنا مع الموزع الموسيقي توما.
وتابع: هي في الأول كانت عايزة تعمل أغنية حقيقية، يعني أغنية بتعبر عن رسالة عايزة تقولها، وحاولت أقنعها بس هي كانت عايزة تعمل أغنية دراما، وتبقى رسالة عايزة أطلعها من جوايا.
وأكمل: فعلا عملنا أغنية "الحضن شوك"، وهي أغنية بتتكلم عن واحدة مضايقة إنها جاية الدنيا أصلا، والحمدلله نزلت الأغنية ونجحت نجاح كبير جدا، وفضلت متصدرة كل المنصات أسبوع مع إنها كانت أغنية كئيبة أوي.
عزيز الشافعي يحكي كواليس أزمة أغنية "بحرية"
كشف الشاعر والملحن عزيز الشافعي أن أغنية "بحرية" تسببت له في أزمة شخصية، دفعته لتسجيل فيديو والرد على الجمهور، قائلا: تاريخيا كل الأغاني اللي اتهاجمت نجحت بالذات لو حلوة، بس "بحرية" كان فيها مشكلة تانية خالص.
وشرح: محمد حماقي كان نزل أول أغنية في ألبومه "قالوا ايه"، وبعدها أعلن إن تاني أغنية في الألبوم هتكون "بحرية" مع شيرين، وعلى "يوتيوب" بينزلوا قبل الأغنية بساعتين جزء كده، فلقيت حماقي بيكلمني بيقولي مش عارف ايه اللي حصل، إحنا نزلنا "بريميير" بس ولقينا الناس عمالة تشتم.
وأكمل: حماقي قالي الناس بتشتم في عزيز الشافعي وقولت للأدمن يشيل الشتائم، فقالي إحنا كل ما نشيل تعليق ينزل عشرة، وكل ده قبل ما الأغنية تنزل، ولما الأغنية نزلت زاد الهجوم بس على الملحن والمؤلف مش على المغني ودي أول مرة تحصل.
وتابع: أنا اللي شوفته واللي حماقي قاله بردو إن كان في حملة ممنهجة ضد عزيز الشافعي، والمشكلة إن الناس لما تشوف كتير بيقولوا إن الأغنية وحشة بيحسوا تلقائيا إنها وحشة (عدوة)، فقضيت يومين كانوا أسوأ أيام حياتي.
وحكى الشافعي عن رد فعله بعد هجوم الجمهور عليه بسبب "بحرية"، قائلا: أنا أول ما لقيت الهجوم ده قفلت الموبايل، حسيت بـ"بانيك"، لأن دي أول مرة تحصلي ومش عارف أعمل ايه، ماكنش في ولا منصة مافيهاش شتائم، وشيرين وحماقي فضلوا يتصلوا عليا ويحاولوا يطمنوا، وشيرين كانت بتتعامل كأنها أمي في الأزمة دي.
وأضاف: بعد يومين الأمور هديت وقعدنا اتكلمنا أنا وشيرين وحماقي، وهما كانوا نفس رؤيتي إن سبب الهجوم هو توقع الجمهور. حماقي قالي الأغنية حلوة جدا بس المشكلة في توقعات الجمهور. وشيرين قالتلي هتتصدر وهيحصل معاها نفس اللي حصل مع "تباعا تباعا"، وفعلا هي لغاية دلوقتي متصدرة كل المنصات.
