شاركت الفنانة المصرية الشابة أميرة أديب جمهورها بعضًا من تفاصيل معاناتها مع الاكتئاب للمرة الأولى، وتحدثت بصراحة عن أصعب فترات مرت بها، مشيرة إلى أن هدفها توجيه رسالة أمل لكل من يمر بظروف مشابهة.
تفاصيل إصابة أميرة أديب بالاكتئاب
قالت أميرة في مقطع مصور نشرته عبر حساباتها على مواقع التواصل، إنها ظلت تعاني من الاكتئاب على مدار عامين، مؤكدة أن شخصيتها الإيجابية التي عرفها الجمهور تغيرت تمامًا خلال تلك الفترة، كما غير الاكتئاب نظرتها للحياة.
وحكت الممثلة الشابة: أنا بقالي سنتين عندي اكتئاب، سنتين بمعنى سنتين. سنتين بقعد في السرير مش قادرة أقوم، بقوم بالعافية. وأفكاري سلبية فقط، البنت اللي كانت دايمًا شايفة الحياة بطريقة كرتونية جدًا، بطريقة بسيطة جدًا، بطريقة إيجابية جدًا... البنت دي كانت بقالها سنتين بجد مش قادرة تقوم من السرير.
وتحدثت أميرة أديب عن أصعب اللحظات التي عاشتها خلال تلك الفترة العصيبة، قائلة: منظوري عن الحياة اختلف تمامًا. للأسف، كان عندي أفكار وحشة قوي، أفكار إن أنا كنت عايزة أؤذي نفسي. وده ما كانش عدم إيمان خالص. بالعكس، يمكن إيماني هو اللي خلاني ما أعملش كده.
وخلال حديثها الصريح، أكدت ابنة الفنانة المصرية منال سلامة أنها كانت تجهل طبيعة الاكتئاب قبل أن تعيش التجربة بنفسها، وقالت: أحيانًا لما كنت بسمع ناس كتير عن الاكتئاب، ما كنتش مستوعبة أو فاهمة غلط.
وأضافت: الاكتئاب بيخليكِ شايفة كل حاجة سودة، كأنك محبوسة ومخنوقة جوه أوضة مالهاش مفتاح، والأوضة دي سودة، وأنت مش عارف تطلع. ولو حد فتح لك الباب وتشوف نور، إنت برضه شايفه ضلمة.
وأوضحت أن أحد أصعب جوانب الاكتئاب كان شعورها بأنها فقدت شخصيتها القديمة، وقالت: جزء كبير من الاكتئاب أساسه أن أميرة القديمة اللي أنا كنت بحبها وكانت الناس بتحبها ماتت ومستحيل ترجع تاني. فكنت بجد في حالة حزن، كأن في حد مات بجد.
هل رفضت أميرة أديب أعمالًا فنية بسبب الاكتئاب؟
كشفت أميرة أديب أن الاكتئاب أثر بشكل مباشر على حياتها العملية، موضحة: قلت لا لكل الشغل اللي جالي، ساعتها أي تمثيل جالي ما كنتش قادرة أتعامل مع ناس. كنت حاسة إني مكروهة، كنت حاسة كل الناس بتكرهني، وإنه أحسن لي إن محدش يشوفني.
وعن تأثر ما حدث على ثقتها بنفسها، شرحت: تقديري لذاتي (السيلف استيم) كان في الأرض. وأي فيديو شفتوا لو عرضت كواليسه كان عبارة عن أني بعيط، وبعد كده "ثري تو وان... أكشن"، ولما التصوير يخلص أحط إيدي على قلبي.
ووصفت الممثلة الشابة العمل بأنه كان وسيلتها للتمسك بالحياة، قائلة: أنا ببقى أساسًا بزق نفسي إني أروح أشتغل وأعمل موسيقى... لأنها كانت الحاجة الوحيدة اللي بتقومني من السرير بجد.
رسالة أميرة أديب لضحايا الاكتئاب
أكدت أميرة أديب، في المقطع، أنها استعانت بأطباء متخصصين حتى تمكنت من تجاوز تلك المرحلة، مؤكدة أن حياتها تغيرت بشكل كبير بعد التعافي.
وقالت: بقيت شايفة الدنيا جميلة تاني، عندي طاقة، البنت القديمة دي رجعت تاني. ما بقيتش أخاف من السوشال ميديا، بقيت أحب صحابي، بقيت أحب الحياة، بقيت أحب الحب، بقيت أروح الجيم، وبقيت أحسن بكتير من زمان أصلًا.
ووجهت رسالة لكل من يمر بتجربة مشابهة، وقالت: لو حد حاسس إحساس وحش دلوقتي، وإنه مفيش مخرج، ممكن تطلعوا منها، بس محتاجة مجهود قوي، ومحتاجة وقت قوي... متفقدوش الأمل.
واختتمت الفيديو برسالة مليئة بالتفاؤل، وقالت ابنة المخرج عادل أديب: أي حد بيمر بأي حاجة دلوقتي، اعرف إنك مش لوحدك، وإن أنا معاك. قلت لكم الاكتئاب طحني، بس أنا قضيت عليه.
