ياسمين غيث تروي تفاصيل قصتها مع السرطان

فتحت الفنانة ياسمين غيث قلبها لأول مرة حول تجربتها مع مرض السرطان، كاشفة عن تفاصيل لحظات الانكسار التي حرصت على إخفائها عن أسرتها، خصوصًا والدتها.

وقالت ياسمين في لقاء ضمن برنامج "ست ستات" على قناة dmc: كنت دايمًا بحاول أبان قوية قدامهم، ما ببكيش وما بقلقش، لكن الحقيقة إني كنت بانهر لوحدي بعيد عنهم. هم كمان اتأثروا، لكن تماسكوا علشاني.

مكانة خاصة في قلب العائلة

كما تحدثت والدة ياسمين عن العلاقة المميزة التي تربطها بها، ووصفتها بأنها "ابنتي الكبرى التي انتظرناها خمس سنوات". وأضافت: هي الطيبة، الجدعة، ما بتسيبش حد وقت الشدة. بنسميها في البيت (البونبونايه) و(المهرّجة) لأنها بتنور البيت بالضحك.

وتابعت قائلة: أنا وياسمين مش بس أم وبنت، إحنا أصحاب، الفارق بينا في العمر مش كبير، علشان كده حاسين إننا شبه بعض جدًا.

علاقة مليئة بالحب والضحك

ياسمين من جهتها، أعربت عن حبها العميق لوالدتها، وقالت: بلعب معاها شطرنج، ونطبخ سوا، وأحيانًا أسيبها تكسبني علشان تضحك. ماما هي حياتي كلها.

صدمة لحظة اكتشاف المرض

روت الأم اللحظة الصادمة التي علمت فيها بإصابة ابنتها: ابنها خدني المستشفى، وهناك عرفت، نزلت على السلم منهارة، ما صدقتش، بس حضنتها وقلت: سيبها على الله، هو القادر يرفع عنها.

معركة مع الخوف والتحول النفسي

وصفت ياسمين السرطان بأنه "ماكانش بس مرض جسدي، لكن اختبار نفسي وروحي". وقالت إنها خاضت صراعًا داخليًا مع الخوف، وتغيرت كثيرًا: بقيت أقوى، اتغيرت نظرتي للعلاقات، واختبرت اللي حوالي بجد.

وفي لحظة تأثر، لم تستطع حبس دموعها أثناء الحديث عن ابنها وذكريات المرض، فقالت: ماقدرتش أتماسك لما شفت ابني بيتكلم عني... دموع أمي كمان بتمسني أوي.

أثر التجربة والخوف المستمر

أكدت ياسمين أن تجربة السرطان تترك أثرًا لا يزول، وقالت: لسه عندي كوابيس إني رجعت أتعب، بصحى مفزوعة بعيط. مش دايمًا قوية، بس دايمًا بحاول.

وقالت إن محنتها كانت كاشفة: عرفت مين اللي بيحبني بجد، ومين اختفى. بس الحمد لله، الكل كان جنبني: أخويا، جوزي، ابني، أمي، أبويا، وأصحابي... محدش اتأخر عني.

قصة حب وزواج مبكر

كشفت عن بدايات علاقتها بزوجها، فقالت: اتعرفت عليه بالصدفة من خلال أصحاب، كنت وقتها عندي 21 سنة. اتجوزنا بسرعة، وخلفت مالك.

وأضافت: الزواج كان مرعب في الأول، لكن لما شفت ابني نسيت كل حاجة. الأمومة دي كانت سلاح مهم في معركتي مع المرض.

اختتمت الإعلامية سناء منصور الحلقة برسالة دعم مؤثرة، قالت فيها: ربنا لما بيقفل باب، بيفتح شبابيك كتير. وياسمين نموذج لواحدة خرجت من الألم أقوى؛ الستات القويات دايمًا بيخلقوا من العتمة نور، ومن الوجع حياة جديدة.