حرص عدد كبير من نجوم الفن في مصر على دعم الفنانة حورية فرغلي، في ظل معاناتها بسبب أنفها وفقدانها حاستي الشم والتذوق منذ 4 سنوات، لإجرائها العديد من العمليات الجراحية بها من أجل العلاج.
وكانت حورية فرغلي، قد تعرضت لحادث منذ عدة سنوات، بسقوطها من ظهر الحصان، لتتعرض إلى كسر في الأنف، خضعت على إثره للعديد من العمليات الجراحية، التي تسببت بتغيير كبير في أنفها.
وحضر عدد من المشاهير، حفل تكريم حورية فرغلي، التي غابت عنه بسبب عدم رغبتها في مواجهة الجمهور بشكلها الحالي، حسب تصريحاتها.
وتواجدت كاميرا "فوشيا" في حفل تكريم حورية، لنلتقي بمجموعة من النجوم، ففي البداية قالت الفنانة عايدة رياض: "حورية إنتي ممثلة جميلة، من أول ما طلعتي كنتي في حضن الجمهور، إزاي متجيش الحفل؟، إحنا بنحبك وكل الوطن العربي بيحبك، لازم ترجعي، سيبك من أي حاجة، بروحك لازم ترجعي تاني".
فيما قالت الفنانة المصرية منة فضالي لـ"فوشيا": "لازم حورية تواجه الجمهور، إحنا بنكلمها بس هي مبتردش، ببعتلها رسائل مبتردش، هي من الناس الجميلة، وحد متصالح مع نفسه".
وأكملت: "مش معنى إن الإنسان يقع إنه ياخد جنب وميواجهش الناس، أنا كنت تعبانة وشكلي كان وحش وقابلت الناس، مش هنفضل طول الوقت شكلنا حلو وزي القمر، الجمال بيروح عموما، مش شرط يحصل حاجة، كلنا عندنا أزمات ومشاكل وظروف ولكن إن تبعدي وتنطوي دي صعبة".
وأردفت فضالي: "لازم تواجهي بنفسك، محدش هيقف جنبك، لو إنتي منتظرة إن حد هيقف جنبك ويطبطب عليكي ده مش هيحصل، أنا هسأل عليكي النهاردة وبكرة وبعده، بس أنا عندي أشغال وممكن مسألش بعد كده".
واستطردت: "أنا بقولها الحقيقة الي مريت بيها وعارفاها، متنتظريش حاجة من حد، إلا أهلك والمقربين أوي منك، غير كده لا".
فيما قالت الفنانة اللبنانية مادلين طبر: "أنا اللي اخترت حورية فرغلي لما كانت في مسابقة ملكة الجمال، المفروض متسمعش ولا ترد على أي تنمر، في ناس سخيفة وتافهة، أنا أحيانا بتعرض للتنمر، بيقولولي إنتي كبرتي والمفروض متظهريش، ومش بسمع لحد".
أما الفنان نضال الشافعي، فقال لـ"فوشيا": "حورية فنانة مثقفة وإنسانة أكثر من رائعة، بقولها متحاوليش تركزي في فكرة التنمر، الناس بتتكلم كده كده، والناس اللي مش كويسين موجودين، لازم بقدر الإمكان نكمل حياتنا وطريقنا، أنا من الداعمين ليها، فنانة قوية وتستحق إنها تكون في مكانة عظيمة بإذن الله".