محمد سامي: جذبني حياء مي عمر.. وبناتي معلميني الأدب
إنستغرام

محمد سامي: جذبني حياء مي عمر.. وبناتي معلميني الأدب

تحدث المخرج المصري محمد سامي، عن تفاصيل حياته الشخصية، وقوة علاقته مع عائلته، وأكثر ما جذبه لزوجته الفنانة مي عمر، إضافة إلى تطرقه للحديث عن نجاح مسلسله الأخير "جعفر العمدة"، كما وصف الممثلة هالة صدقي "بالعمود الفقري".

وحول سبب إعجابه بزوجته مي عمر، قال سامي: "أول حاجة لفتت نظري في مي هو جمالها وأن عندها حياء وكلامها قليل، ومعندهاش طباع موجودة عند ستات بتضايق؛ لأنها مش حشرية ومش شخصية خفيفة بالعكس راسية".

وأضاف: "مي بتغير زي أي ست لكن مش بتهزق نفسها وتقل قيمة زعلها ومش عمال على بطال تفقد الحاجات قيمتها لكنها بتعزز قيمة الريآكشن وقيمة الزعل، ولما تتجاهلني تمامًا أعرف إنها زعلانة، والراجل الطبيعي مش مطلوب منه يخلي مراته تغير مطلوب منه يتصرف بشكل طبيعي".

وأشار سامي خلال لقائه مع برنامج "جمعتنا الليلة" إلى أن زوجته لا تنزعج من عدم مشاركتها في جميع أعماله: "عارفة إن كل الفنانات اللي بصور معاهم هما إخواتي وصحابي، وآخر عملين اشتغلتهم مع مي كانوا بالمحايلة علشان تكون معايا في المنطقة دي بتقول بناقص طالما الناس بتتكلم علينا".

وأكد دعمها الدائم له: "مي عمر حياتها مزيكا وحياتها هدوء وراحة أعصاب ولو هي شخصية مزعجة ما كنتش هعرف أنجح النجاح ده لكنها بتدعمني وعاقلة ولذيذة وهي صاحبتي وأنا ماشي خارج من الحلقة لما بشوف حاجة عاجبتني بصورها وأبعت ليها وهي كمان كده لأننا مش بننبسط غير مع بعض ومش بنضحك غير مع بعض".

ابنتاه

وتحدث سامي عن علاقته بابنتيه وحرصه على الإلمام بجميع تفاصيلهما: "بناتي الاتنين معلمني الأدب، وأكاد أكون أكتر أب شخصيته ضعيفة أمام ولاده، وحشري جدا في حياتهم عشان حابب أكون ملم بكل تفاصيلهم، بنزل أشتري معاهم اللبس وأشوف مذاكرتهم، وبنتي الكبيرة واخدة شخصيتي، وسيلين الصغيرة شبه مي شكلا ومضمونا".

والده ووالدته

وحول علاقته بوالده ووالدته، قال: "أنا تحت جزمة أمي وأبويا هما حياتي، ولما بتجيلي مشكلة مش بعيط غير في حضن أمي، هي مصدر قوتي وأول حد صدق فيا، وبحكي لها كل حاجة يمنعني كبريائي إني أقولها لغيرها، ومراتي شريكة حياتي طبعا بس مفيش راجل بيحب يبين ضعفه وانكساره قدامها".

وأشار إلى قوة العلاقة التي تجمعه بهما: "إحنا بيوتنا ورا بعض وحياتنا كل يوم مع بعض، إحنا مش عيلة بتسأل على بعض في الأعياد بس، إحنا كل يوم مع بعض وبنحكي كل حاجة لبعض، ومي مراتي وروحها في أمي وهي بتدافع عنها لما يحصل مشكلة بينا".

مسلسل "جعفر العمدة"

إنستغرام

كما تطرق المخرج المصري خلال المقابلة للحديث عن نجاح مسلسله "جعفر العمدة"، مبديا سعادته بالتعاون مع الفنانة هالة صدقي والفنان محمد رمضان.

ووصف صدقي "بالعمود الفقري" للمسلسل: "هالة صدقي أستاذتي الموهوبة الخلوقة اللي كانت لمانا كلنا في حضنها، وهي العمود الفقري للمسلسل، كان معانا خبرة وأخلاق وزوق، وبشكرها إنها يوم ما قلتلها تعمل دور أم لناس كبيرة سنا وافقت وقالت أنا ممثلة".

وأضاف: "هي ست جميلة وخفيفة الظل ويا بختي إن يتحط في تاريخي إني اشتغلت معاها، ومن حق الممثلين أصحاب القدرات دي إنهم يتعاملوا مع ناس تقدر تطلع القدرات دي منهم".

وحول تعاونه مع الفنان محمد رمضان: "في بيني وبين رمضان كيميا كبيرة، ودايما بنشوف الأمور زي بعض وبنسمع الكلام بطريقة واحدة، وده توافق ربنا بيخلقه، نقدر نقول إن الموجة بتاعتي أنا وهو ظابطة زيادة عن اللزوم".

وتابع سامي: "وساعات يحصل إني أكون رايح أقوله على ملحوظة، ألاقيه هو جاي يقول نفس الكلام، ودايما بقوله أقوى اتنين في الوطن العربي في الوسط الفني هما أمي وأمك؛ لأن دعوتهم مع بعض بتؤدي لأشياء جميلة".

خلافاته مع الفنانين

وكشف سبب خلافاته مع معظم الفنانين الذين يعمل معهم، وسبب انفعاله عليهم في موقع التصوير، موضحا: "لما بتعصب على ممثل بيبقى يا إما هو بليد، أو مواعيده مش مظبوطة، أو مش بيذاكر ولا بيحفظ، وده طبعا بيعطل زمايله".

وأضاف: "هو كده هيفشل ويفشلنا معاه، ويبقى ممثل جاي متأخر ومش مركز ويسلب حقوقنا كلنا، وبتخانق معاه مهما كان مين ونجوميته قد إيه؛ لأن النجوم الحقيقيين أصلا محترمين، وعمري ما اشتغلت مع نجم كبير ومكنش محترم، دايما المشاكل بتيجي من أنصاف الفنانين".

وواصل سامي حديثه: "أنصاف الفنانين اللي بييجي من وراهم مشاكل، بيبقى عايز طول الوقت يقول أنا نجم، فمش بيفكر في الشغل نفسه، ونجم زي محمد رمضان وأحمد السقا دول ناس تعلم جيدا إنهم نجوم وناجحين، فبيركزوا في شغلهم".

وأكد أن المشاكل تحدث بسبب كل فنان يعتقد أنه "نجم" رغم أن دوره لا يؤثر في محور المسلسل: "والنجوم دول أول ناس بتيجي في ميعادها، وأكتر ناس مذاكرين وعندهم حرص على نجاح المشروع، زي الفنانين عادل إمام، والراحل محمود عبد العزيز، وأحمد عز، فالمشاكل بتيجي من الناس اللي بتبقى فاكرة إنهم نجوم وبيحاول يثبت ده برغم إن دوره مش هيأثر على بيع العمل بدولار واحد حتى".

Related Stories

No stories found.
logo
فوشيا
www.foochia.com