رد الفنان المصري أحمد فلوكس، على اتهامات اعتزاله الفن بدعوى أنه حرام، مؤكدا أن الفن رسالة مهمة جدا، وعلق: "أنا مش عايز أمثل، أنا داخل أنتج.. وطموحي العالمية".
وقال فلوكس عبر برنامج "حبر سري" إن البعض اعتبر أراءه الجدلية هي محاولة لتسليط الضوء عليه، معلنا عدم رغبته بدخول مجال التمثيل، واتجاهه نحو الإنتاج الدرامي.
وأشار الفنان المصري إلى أنه لم يكسب المال من عمله في الفن، مضيفا: "الفن مش حرام ومعملتش فلوس من الفن ولكن من الشغل الخاص وبعد فيلم الممر اشتغلت فى شركة تطوير عقاري وكنت باخذ 5 آلاف جنيه ووصلت أني أبقى نائب رئيس الشركة، ولكن أنا معملتش فلوس من الفن.. وأنا كنت بحب الفن قوي وما زلت أحب الفن وفي ناس كانت بتأخذ ملايين وأنا بأخذ ملاليم وكنت بصرف نصهم على شغلي وعلى تطوير نفسي".
وعن هجومه على الفنانة المصرية إلهام شاهين والفنانة أمينة خليل، أوضح أحمد فلوكس أنه يكن لهما الاحترام والتقدير، والكثير من الحب، وعلق: "من حقي كمسلم وراجل وفنان أقول رأيي في الحاجات دي.. لو لعبنا في عاداتنا وتقاليدنا هيروح العرض فتروح الأرض".
ونفى أحمد فلوكس هجومه على الفنانة أمينة خليل بعد رؤية مشهدها في مسلسل "نمرة تنين" الذي اعتبره يتعدى حدود الأدب والأخلاق، وقال: "مهاجمتش أمينة خليل وأنا بعشق أمينة وبحترمها جدا، لكن هاجمت الرقابة اللي عدى عليها حاجة زي دي.. المشهد ابني اللي عنده 14 سنة هو اللي بعتهولي فانصدمت".
وأضاف: "كل واحد يقول اللي هو عايزه، وكل واحد يرد على اللي هو عايزه، لكن هو مش إجبار إنه حضرتك تقولي وأنا أسكت، لا أنا مش عاجبني الكلام ده، والكلام ده مش صح، وهل معنى إنه أرفض ده وأقول إنه ده غلط، يعني إني ما بحترمش الناس الكبيرة، لا خالص بحترمهم، أنا مغلطتش فيها، وأنا كان طلبي ما نتكلمش بالحاجات دي".
وأكد الفنان المصري أحمد فلوكس، عدم وجود أي خلاف بينه وبين النجم محمد رمضان، وأعرب: "مكنش عندي خلاف مع محمد رمضان وأنا حاليا مش عايز أمثل ومهتم بالبيزنس ولا أعتقد محمد رمضان يعرض عليا لأنه مش هيعمل عمل يبقى في نجمين وأنا داخل أنتج، وهو ماشي في سكة كويسة، وربنا يوفقه".