أكدت الفنانة المصرية زينة، شعورها بالثقة والرضا عن مظهرها الخارجي، مشيرة إلى أن ملامح وجهها "النحيف" أصبحت موضة تتباهى بها النساء، بعدما كانت تعاير به سابقا ويقال عنها صاحبة وجه "معضم".
وقالت زينة خلال لقائها مع برنامج "مساء dmc" مع الإعلامية إيمان الحصري: "بحاول أكون أنا، وعندما أسافر خارج مصر وأشوف بنات هناك، بأشعر أنني أجمل منهم، مبسوطة بشكلي ومبحبش أغيره، ممكن أغير لون شعري لكن أقصه دي خطوة مقدرش عليها وأخاف منها، أنا بحب الشعر القصير ونفسي أعمل شعري كاريه".
وأضافت: "زمان كانوا بيقولوا عليا وشي معضم، وشي المنحوت موضة دلوقتي وفيه بنات بتسافر بره عشان يعملوا إطلالتي".
مسلسل "جعفر العمدة"
وتحدثت زينة عن دورها في مسلسل "جعفر العمدة" والذي جسدت من خلاله شخصية "عايدة": "البطلة دايما بتكون حبيبة البطل، والجمهور عارف أني بعمل أدوار معينة وعمري ما عملت بطولة مع نجم ودايما بعمل مسلسلات باسمي".
وأشارت إلى كواليس عرض المسلسل عليها: "هما عرضوا عليا وقالوا لي اختاري اللي أنت عاوزاه ولما قلت لهم خلينا في عمل تاني، قالوا لو في دور عاجبك ممكن نكبر مساحته، والفنان لازم يكون ذكي في اختياراته وأنه يعمل اللي يقدر يكسب به من المسلسل، ودايمًا الناس اللي مخها شغال عارفين هيسكبوا إيه من إيه".
وكشفت سبب قبولها شخصية "عايدة": "هل أنا عاوزة أعمل دور حد من الزملاء لأ أنا كنت محتاجه عايدة الطيبة دلوقتي لأني عملت الشر قبل كده ومش هعمل دلال أكيد لأنها شخصية شريرة وثريا لأن الدور ده كان مكتوب لمي كساب".
وحول تعاونها مع الفنان محمد رمضان، تحدثت زينة: "حاجة كويسة أني أطلع مع نجم زي محمد رمضان نجاحه مضمون بدور البنت الحلوة اللذيذة الغريبة والمختلفة مفيش غيرها هي اللي مختلف".
وأضافت: "وممكن السنة الجاية أكون محتاجة حاجة تانية لأن الفنان لازم يكون ذكي حتى لو بتختاري من حاجة مش هترضي غرورك الفني ولا موهبتك فاتحركي في الحتة اللي انت فيها".
انعزالها في كواليس العمل
وكشفت زينة سبب انعزالها عن كواليس العمل، موضحة: "الروح بتاعت الشغل روح شغل فقط، وأنا كنت معزولة لأني بحب أركز أوي ومش بحب أضيع طاقتي في الكلام في حاجة غير الشغل وكنت بخرج من أوضتي أعمل المشهد وأرجع تاني، لأني لو سبت نفسي للرغي والهزار مش هطلع حاجة، فلازم تحافظي على مود الشخصية فأنا كنت منعزلة".
وأضافت: "خلصت يوم 13 مارس وهما كان عندهم يوم بعدي، ومكانش عندنا حاجة خالص في رمضان ودي من الحاجات النوادر اللي تحسب للمخرج أننا خلصنا بدري لأن التصوير في رمضان متعب".
طقوسها في شهر رمضان
وتطرقت زينة خلال المقابلة للحديث عن طقوسها في شهر رمضان، مشيرة إلى أنها أول سنة تشعر بروحانيته، لكونها أنهت تصوير مسلسلها قبل الشهر الكريم.
وأضافت: "السنة دي خلصنا تصوير بدري قبل رمضان وده يحسب للمخرج، فكان عندي فرصة السنة دي للعبادات، مش الشيخة زينة، لكن كان فيه روحانيات أكتر إني عاوزة أقوم أصلي وأقرأ قرآن أو أتفرج على التلفزيون، وحسيت إني حرة، وبقالي سنين محستش الإحساس ده، فكنت مبسوطة وكان في عبادات وعزومات".
وتابعت زينة: "أنا شاطرة في المطبخ وبعرف أعمل ملوخية، وكل حاجات الإيطالي، ومليش في الحلويات، وبعمل فراخ حلو، لكني مش باكل طيور ولو عزمتيني وحطيتي في الأكل معرفش طعمها، ولكن بعملها حلو".
