شريف منير: لم أتزوج على امرأتي أثناء مرضها.. وهذا سبب خلافي مع شيرين عبدالوهاب
أرشيف فوشيا
كشف الفنان المصري شريف منير، حقيقة زواجه على زوجته الأولى في فترة مرضها، نافيا كل ما تم تداوله بشأن تركها مريضة، أو خدمة زوجته الثانية لها في تلك الفترة.
وقال منير خلال ظهوره في برنامج "أنا والقناع": "لما اتجوزت على مراتي كانت في عز عنفوانها وتعبت بعد جوازي بكذا سنة وأنا مش بالقسوة دي.. وكان في خلاف بينا خيرتها ننفصل قالت لي مش هنفصل وعرفتها أني هتجوز وحياتي كانت ماشية ورجعت تعافت لما خدت الكيماوي، وكانت هي وولادي بيجوا لي كل جمعة في بيتي".
وحول حقيقة خدمة زوجته الثانية للأولى وهي مريضة، تحدث منير: "مراتي الله يرحمها أم ولادي لما كانت تعبانة مراتي الحالية زارتها مرة واحدة، وما كانتش صاحبتها وما خدمتش حد؛ لكنها راحت معايا وهي تعبانة وراحت مرة واحدة ليها قعدت عشر دقايق".
خلافه مع شيرين عبد الوهاب
كما تطرق للحديث عن سبب خلافه مع المطربة شيرين عبد الوهاب، مشيرا إلى أنه وقع لأمر يتعلق بأبنائه، وقال: "الموضوع خلص ومكنش تكليف نقط ماية، كان فيه رخام وطوب بيقع من فوق وكان فيه أولادي، ولما اعترضت كان رد الفعل زيادة شوية ومقدرتش استحمله وبتغاضى بحدود لكن لا أقبل الإهانة أو التنازل".
صفات شريف منير
ووصف الفنان المصري نفسه "بالشخص الذي يوجه العتب واللوم لمن حوله، والقاسي على ذاته"، مبينا وجود صديقة قديمة له تدعى "حنان" كانت تطلب منه بشكل دائم "ألا يجلد نفسه" بحسب تعبيره.
وأبدى تخوفه من "المجهول" الذي ينتظره في الأيام القادمة، مضيفا: "ماليش دعوة باللي جاي لأنه بإيد ربنا، وأهم حاجة عندي ما كنش تقيل على حد وأضايقه خاصة لما الواحد يكبر وينسى ويجي له زهايمر".
خلاف بينه وبين زميل له
وأضاف: "كان في خلاف بيني وبين حد في الوسط ولو كنت كملت في اللي أنا فيه، كنت هخسر فتنازلي كان مكسب وما خسرتش المعركة بالعكس كان فيه رد اعتبار ليا واعتذار، أحسن ما آخد موقف جامد يخسرني جمهور كبير".
وعن رأيه في وضع رقابة على الفن، قال منير: "الرقابة والشروط جوه الإنسان وهي إن أنا عندي حدود مش بحب اتعداها، وأنا فنان من حقي أقول رأي في أي فن يتعمل حواليا".
الانتقادات التي يتعرض لها
وأكد أنه لم يعد يكترث للانتقادات والتعليقات السلبية التي يراها من قبل المتابعين؛ لأنه أصبح أكثر رزانة، حيث يكتفي بمشاهدتها ووضع "البلوك" لأصحابها.
وقال: "من كتر ارتباطي بمصر وحبي للوطن عندي علم في بيتي وبيتريقوا عليا ساعات ويقولوا لي فين العلم، ودول في الزبالة على طول لأن اللي يتكلم عن علم مصر ويتريق ويتكلم عن وطنيتي في الزبالة".
حياته الشخصية
أخبار ذات صلة
وتطرق للفنان المصري للحديث عن والده الراحل: "كنت بحب والدي وبحترمه وأنا من الجيل اللي اتربى على احترام الكبير والجار فكنت بعمل حساب لأبويا، والقسوة أحيانا بتبقى مطلوبة بس مش لدرجة إنها تسيب أثر جوة الشخص ويعمل عقدة وأنا نسخة من والدي بس متطور".
تربيته لأولاده
وأضاف: "القسوة اللي بيني وبين أولادي مفيهاش مد إيدين أو ضرب والجيل بتاع دلوقتي مينفعش يتضرب وبيبقى فيه اقوى من الضرب وهو الخصام ده أقوى من الضرب".
وتابع: "بعد ما أبويا مات وكبرت وخلفت وبفتكر الأيام اللي حصلت بيني وبينه بقول عنده حق ولو مكنش عمل كدة كانت هتبقى حياتي تانية خالص أنا بحبه بكل ما فيه أنا مفتقده".
دعم والدته له
وتحدث منير عن دعم ولدته له، موضحا: "أمي كانت بتشيل مشاكل على كتافها بسببي ودفعت ده تمنة كتير وهي أكتر حد في حياتي شجعني على الفن من بداية ما بدأت لحد ما احترفته، وأمي ملحقتش تشوفه ودعمت وماشفتش".
