كشفت الممثلة المصرية إنجي وجدان عن معاناتها مع الوزن الزائد طوال حياتها، مؤكدة أن والدتها تسببت لها بعقدة نفسية إثر ذلك.
وقالت وجدان في حوار تلفزيوني عبر برنامج "الستات": "إحنا طبيعي بنمر بظروف صعبة في حياتنا، غصب عننا إحنا بني آدمين، عشان كده لازم ثقتي تفضل موجودة وزي ما بقول للناس بقول لنفسي، وأنا مقتنعة إني أقف قدام المراية أقول كام كلمة حلوين ليا الصبح، وبالليل قبل ما أنام، خاصة لو محبطة، وعندي جملة بقولها دايمًا انتي جميلة زي ما انتي، بقولها لنفسي ولأي حد".
وأشارت الممثلة المصرية إلى أنها في فترة الطفولة، كانت تسعى لممارسة الرياضة بشكل كبير، معلقة: "أنا كنت رياضية وكنت بدخل بطولات وكنت باليه مائي وكنت المفروض أدخل المنتخب، وكنا ممكن نتمرن عشر ساعات تحت المياه وبعدها بطلت بسبب الثانوية العامة وكنت باكل بنفس الطريقة فضلت شوية مش بتخن وبعدين بدأت أتخن".
وأكدت إنجي وجدان أنها تعرضت لضغط كبير من والدتها بعد زيادة وزنها، وقالت: "مامتي قررت تعقدني في حياتي بسبب التخن وضغطت عليا ودخلت في دوامة إني مش حابة نفسي وثقتي في نفسي قلت وكنت باكل وأتخن".
ووجهت رسالة لوالدتها بعد أن تسببت بعقدة لها طوال حياتها، وقالت: "مامي صاحبتي، بس نهدا شوي على موضوع الخسسان.. بقول لها انتي عقدتيني، هي صاحبتي على فكرة، ولحد النهاردة بتقول لي انتي تخنتي، وده جزء من يومي بيلف حوالين أنا تخنت ولا خسيت".
وأضافت الممثلة المصرية: "هي مش شايفاني حلوة زي ما أنا وما حببتنيش في نفسي، على الرغم من إنها صاحبتي جداً، وكانت بتعمل كده بدافع حبها ليا، لأنها متعقدة إن صحابها أرفع منها ومش عايزاني أبقى زيها، وقعدت فترة في حياتي مهزوزة، أقرب حد ليا مش مخلياني واثقة في نفسي، علشان كده بنصح الأمهات يخلوا بالهم لأن الضغط على أطفالكم بيخلي ثقتهم مهزوزة".
وأضافت: "زوجي بيحبني زي ما أنا، سواء خسيت أو تخنت.. إحنا متجوزين من 10 سنين، ونعرف بعض من أيام الجامعة، وبيننا أشياء أكبر من إنه يسألني إنت تخنتي".
