كشفت الإعلامية المصرية الشابة، ياسمين عز، أنها ستخصص حلقة من برنامجها تحت عنوان "تفخيم الزوج"، ووجهت نصائح للزوجات في هذا الشأن.
وقالت ياسمين عز المعروف عنها أنها تُناصر الرجال أكثر من النساء خلال برنامجها "كلام الناس" عبر قناة mbc مصر: "ليه بتنادي على جوزك بدون ألقاب، أنا هعمل لكم حلقة بعنوان تفخيم الزوج".
وأضافت: "قوليله يا أستاذ محمد تحب تشرب إيه، مفيش حاجة اسمها يا محمااا".
وتابعت الإعلامية الشابة: "أوعي ما تكمليش آخر حرف من اسم الراجل زي ما أنتِ ما تقبليش ياكل آخر حرف في اسمك، هل تقبلي يكون اسمك سماح وينادي عليكي بسمااا..قولي له أستاذ للتفخيم ومحمد للتنعيم الشتوي.. وبنقول يا مش أيها، لأن يا للقريب الحبيب".
ولفتت ياسمين: "مفيش حاجة اسمها جوزك أستاذ محمد بينزل السبت من البلكونة، لازم نحافظ على تفخيمه، أنا بعتذر لك الغي السبت أرجوكي ما ينفعش يقف في البلكون ينزل السبت أنتِ كده هتهزي كيانه".
كما وجهت ياسمين عز نصائح للسيدات المتزوجات من مهندسين، قائلة: "لو زوجك مهندس لازم تحسسيه بالدفا والحنان لأن حياته كلها مربعات ودواير ومستطيلات، ومحتاج يرتاح، وبروزي اسمه بين قوسين مفخمين ومزركشين ومزينين، قولي له الباشمهندس وفخمي فيه قدام صحابك، قولي لصاحبتك أن فتح ليكي البلكونة اللي في التجمع على النيل وبقيت الشوف النيل من بلكونتي لأنه راجل خارق يقدر يعمل أي حاجة".
وقبل أيام استضافت ياسمين عز الفنانة فيفي عبده، وكشفت الأخيرة عن رأيها في التصريحات التي تدلي بها ياسمين ودفاعها عن الرجال بشكل مستمر.
وقالت فيفي عبده لـ ياسمين عز: "أنتي نحنوحة أوي ومش سهلة بس لذيذة وطيبة، وممكن بتقولي الكلام ده بحسن نية".
وردت ياسمين عز على فيفي عبده قائلة: "هعمل إيه.. أنا بشوف كل الرجالة غلابة والوحشين اللي بتتكلموا عليهم دول ما شفتهمش".
لترد فيفي عبده: "ما شاء الله علشان ما تتحسديش ده بخت يا حبيبتي في ناس عايشة في نار جهنم، وربنا يراضي كل الستات ويرضى أزواجهم عليهم".
وسألت ياسمين عز فيفي عبده عن رأيها في التصريحات التي تعرضت بسببها لهجوم قائلة: "أنا قلت في مرة أن الزوج نعمة ربنا في الأرض وأحلى حاجة في الدنيا، إيه رأيك؟".
فقالت فيفي عبده: "لأ طبعًا ده أنتي نحنوحة أوي يا ياسمين في حاجات حلوة كتير والستات والأولاد حلوة والصحبة حلوة، وبرضه الست ما تقدرسش تستغنى عن الراجل، ولازم الست تخلي للراجل الحياة حلوة علشان ما يستغناش عنها".
