أبدت النجمة المصرية رانيا يوسف، إعجابها الشديد باللاعب الأرجنتيني ليونيل ميسي، وأكدت أن تشجعيها لنادي برشلونة، بسبب وجود أصدقاء مشتركين بينهما.
وعبرت رانيا يوسف خلال لقاء تلفزيوني عبر برنامج "كلام الناس"، عن إعجابها الكبير بعلاقة ميسي مع زوجته أنتونيلا روكوزو، مشيرة إلى أنها تتمنى نماذج مثله في مصر.
وقالت رانيا يوسف: "أنا بشجع اللعب الحلو، بس مبدئياً عشان في بينا أصدقاء مشتركين، كنت بشجع برشلونة طبعاً، أنا عارفة إنه لاعب جامد جداً، لكن أنا بحبه كراجل أكتر، وزوج لأن كان عنده مشاكل صحية وبيتعالج لكنه تغلب عليها وما زال متواضع وبسيط في حياته، هو مش عايش المنظرة والفشخرة، وحتى الأصدقاء المشتركين بيننا بيتكلموا عليه إنه بني آدم إلى أقصى حد، وده بعليه بنظري، وبغير لأنه شايف مراته كروح مش شايف واحدة بتلبس براندات، وشايف الشخصية الحقيقية، ليه معندناش النموذج دا في مصر؟".
وأضافت: "أنا ممكن أسامح الراجل في النزوات اللي بدون مشاعر لو فيه بيت وأطفال ورصيد من الحب، وفيه نزوات ومفهاش مشاعر لو له رصيد وفيه بيت وأطفال ممكن أسامح لو ندمان والموضوع تافه، وبنتي فوقتني في أول جوازة ليا وقالت لي مش بتضحكي خالص يا ماما؟ والكلمة دي وجعتني وحسيت إني مش قادرة أمثل إني سعيدة وقررت أنفصل".
وتابعت الفنانة: "الست لما بتعمل حفلة بتكون موجوعة بس عايزة تبين العكس وبنكون مكسورين أوي، ومفيش ست وراجل بينفصلوا بعد عشرة دا أنتي لما بتربي قطة وبتروح منك بتتوجعي مش معقول مش هتتأثري، والراجل بيتوجع بعد فترة من الانفصال وبيكتشف أنه بيضيع ست كويسة".
واستكملت رانيا يوسف حديثها التلفزيوني: "كنت أتمنى أكون مدلعة، ولكن الدلع عيب بردو لأن لو الشخص اللي معتمدة عليه دا راح الدنيا هتقع، عانوا معايا كتير في جوازاتي، وأنا كنت محاربة وبنتي الكبيرة قالت لي أنتي عقدتيني من الناس يا ماما، وكلمة وجعتني لأني غلطت كتير واتجوزت 3 مرات".
وأكدت رانيا أنها تفضل "ضل الحيطة على ضل الراجل"، مشيرة إلى أنها من المستحيل أن تقبل بالزواج من "سي السيد"، وقالت: "أنا بفضل ضل الحيطة عن ضل الراجل، وعمري ما هتجوز واحد سي السيد، وزي ما الراجل جواه طفل أنا كمان جوايا طفلة، الراجل الحلو شكلًا دا بيكون من برا بس ولكن في الحياة والمسؤوليات الموضوع بيختلف، وبحس الرجالة بيخافوا مني وبيغيروا وبيتضايقوا لو بقيت مستقلة ماديا لأنهم عايزين أفضل معتمدة عليهم".
