ياسمين عز لـ رونالدو: ميسي تزوج وربنا كرمه ووصل للنهائي.. وكلامي دعوة للستر

لم تكترث الإعلامية المصرية ياسمين عز لردود الفعل الساخرة التي صاحبت تصريحاتها تجاه اللاعب البرتغالي كريستيانو رونالدو عندما بكى عقب خروج منتخبه البرتغال أمام المغرب في الدور ربع النهائي، لتعود مجددًا وتوجه له رسالة عقب صعود الأرجنتين لنهائي المونديال بقيادة ميسي.
وكانت ياسمين عز قد صرحت في حلقة برنامجها "كلام الناس" الماضية: "رسالتي لرونالدو، وأنا عارفه أنه بيتابع البرنامج وبيحبنا وبيحب البرنامج .. والنبي يا شيخ اجبر بخاطر جورجينا واتجوزها، شايلاك في عينيها وصاينه ولادك ومحافظه عليهم، وعمرها ما اشتكت“.
وعادت الإعلامية المصرية ووجهت نصائحها لرونالدو مرة أخرى في حلقة جديدة، مؤكدة أن الزواج والستر أجمل شيء، بجانب الحديث عن شائعة وقف برنامجها.
وقالت ياسمين عز "أنا بدعو لستر البنت وبالجواز والدلع مش الطلاق، عايزني أقوله خليك ماشي معاها سداح مداح، بقول له مفيش أجمل من الحلال والستر وربنا عمره ما هيكرمك من غير جواز، شوف ميسي لما أتجوز ربنا كرمه ووصل للنهائي، وربنا يهدي جورجينا أم العيال ويصلح الحال".
وأضافت: "الناس بتقول رونالدو عنده 37 سنة وعجز وهيعتزل، عجز إيه اعقلوا الكلام؟ مفيش راجل بيعجز يا حبيبتي معروفة، وكل سن وله حلاوته والراجل تلاقيه 70 سنة ومش باين عليه هو ربنا خلقه كدا جيناته قوية".
وتابعت ياسمين:" رونالدو مش عايز يتجوز جورجينا عشان متاخدش نص فلوسه لو اتطلقت وكمان أمه مش راضية، شوفوا رضا الأم دا أهم حاجة، وميقدرش يكسر كلام أمه ولا يقولها غصب عنك هتجوزها، وكلامي دعوة للستر ومش فاهمة الناس معترضين ليه على كلامي؟".
كما علقت على شائعة وقف برنامجها، قائلة: "اللي بيقف في صف الرجالة بيروح جنة الأرض والسما، وقولت لكم لما تبقوا عايزين تتسلوا نتسلى مع بعض، وبرنامجي موجود وعلى الهواء مباشرة إلا بقى لو مش قادرين على غيابي ممكن أطلع لكم طول الأسبوع".
يذكر أن منتخب الأرجنتين سيلاقي نظيره الفرنسي في المباراة النهائية لكأس العالم التي ستقام يوم الأحد المقبل، ليسدل الستار على البطولة الكروية العالمية التي شهدت مفاجآت أبرزها إطاحة منتخب المغرب للعديد من المنتخبات القوية ووصوله إلى الدور نصف النهائي قبل أن يخسر من فرنسا بهدفين دون رد.