دافعت الممثلة المصرية فريدة سيف النصر عن رد الفنان محمد رمضان بعد اتهامه بفيديو "خادش"، واتهامه أيضًا بنشر البلطجة والعنف من خلال أعماله.
وقالت سيف النصر: "بقى محمد رمضان اللي بوظ الجيل، ده إحنا شبابنا يبوظوا أجيال بحالها، ووقفة النواصي توريكوا، ودماغهم ضاربة من المخدرات وبيقتلوا باسم الحب".
وأضافت في تصريحات لـ"القاهرة 24" أنه ليس محمد رمضان وحده من يجب أن يُحارب بل أيضًا محمد سعد ومحمد هنيدي وهاني رمزي ، معلقة: "قعدوهم في البيت".
وأعربت عن استيائها من تجاهل نجوم كبار وتركهم دون عمل، قائلة: "في أسماء كبيرة مش بتشتغل، زي خالد زكي وأحمد عبد العزيز وعبد العزيز مخيون، يعني ايه ما يشتغلوش ويشحتوا مع أن أسمائهم كانت منورة".
وبشأن الهجوم الذي تعرض له محمد رمضان بعد دفاعه عن نفسه عقب انتشار فيديو قيل إنه خادش منسوب له، علقت فريدة سيف النصر: "رد محمد رمضان أقل واجب، لو ما ردش كده مكنش يبقى راجل، ده ابن بلد مش من الزمالك وطلع عين أبوه ده كده مؤدب في رده، هاجمني زي ما أنت عايز لكن تتكلم في عرضي أشعقلك، مضيفة: مستغربة الناس اللي صدقت الفيديو المنتشر مع أن كل أهل أسوان والأفارقة شبهه.. واللي مش عاجبهم رده يولعوا بجاز، هما مستنين منه يقول سوري كده علشان يبان ناعم ومايص لكن رده رجولة".
يأتي ذلك أيضًا بعد أن استنكرت الممثلة المصرية الهجوم على الفنانين، مشيرة إلى أنّ لهم دورا قويا في المجتمع، ويوفرون دخلا لحوالي 14 مليون شخص، ما بين عامل في مسلسل، أو كاتب أو مخرج وغيره، مبدية استغرابها من التعليقات السلبية التي يتلقاها النجوم عبر مواقع التواصل.
وقالت سيف النصر في رسالة دونتها عبر حسابها في فيسبوك: أنا زعلانه علينا كلنا.. المصريين أحلى وأطيب وأجدع من كده بكتير، خفة دم وكرم وذوق، إيه اللي حصل؟، ليه بنستخبي ورا شاشات وتنزل نحر رقاب بعض، الكلمة القاسية بتذبح، بقينا نكديين منعرفش نفرق بين جد وهزار، كله عايز يتخانق مع كله.. إيه ده، كل يوم يعاملوك بوش أو حسب المصلحة“.
وأضافت الممثلة المصرية: ”في إيه بعض الناس ماسكين الفنانين وكأن في تار بلا أسباب، دي عجزت ودي كرمشت ودي غيرت دينها، وده دمه تقيل وده كبر في السن لكن بيغني، وده بيرقص كونغرو، وده اتكسح ودي روحي موتي كفايه.. مالكم في إيه بجد.. هما الناس دي ما أسعدتكمش أعمالهم فترات من الزمن؟، طيب بلاش أنت مابتحبيش فلان غيرك بيحبه“.
كما تابعت: ”في إيه يا جماعة تحسوا مخطط لهدم الفنانين القوى الناعمة، اللي فاتحين بيوت 14 مليون متخيلين، كل المهن شغالة معانا تحت أيديهم كام عامل، وأسطى كل واحد فيهم عنده أهل وزوجه، وأطفال وفي اللي جوز ولاده وعندهم بيوت مفتوحة، بتحاربوا تمن عدد البلد في أكل عيشهم، اقرأوا كده المسلسل بيكتب ناس قد إيه عِمالة في العمل، كفاية هد في الفن.
الوحش انقدوه بأدب والكويس شجعوه، إنما تهزأوا فنانين كبار ليه يعني، على فكره أنا عارفة إنها لجان مستهدفة الفن المصري، والفن عمومًا ما هو العربي بيصب هنا.. هاه قرروا إيه.. هنشتم من ورا الشاشة، ولا هنقول كلام نصح حلو يا باشا".
