حمو بيكا يرد على الساخرين من عدم استكمال تعليمه بعد نصائحه لطلبة الثانوية

علق مطرب المهرجانات المصري حمو بيكا على الانتقادات التي تعرض لها، بعد نشره نصائح لطلبة الثانوية العامة عبر صفحته بموقع فيسبوك، رغم كونه غير متعلم ولا يقرأ ولا يكتب.

وكتب حمو بيكا في موقع فيسبوك: "بتقولوا عني جاهل ومش متعلم، مع إن دي حاجة، أنا عمري ما أنكرتها ولا حتى خبيتها على الناس، ومن يوم ما ربنا كرمني واشتهرت وبقى ليا جمهور".

وأضاف: "بس هرجع وأقولكم تاني إنها حاجة ماكنتش بإيدي، أنت بقى يا "متعلم"، التعليم علمك إنك تقعد تعاير الناس بعيوبها؟ التعليم علمك إنك تفضل تتنمر على خلق الله؟ التعليم علمك إنك مباح ليك الشتيمة في حد هو أقل منك في شيء؟ أكيد لا فمتجيش من ورا شاشة وكيبورد تعمل فيها عم الناصح، وأنت أصلا موركش حاجة تعملها، أنا متعلمتش ومنولتش الشرف الكبير ده، بس اتعلمت حاجات كتير في الدنيا أنت متعلمتهاش لسه".

وتابع: "تعلمت احترام الكبير والصغير، اتعلمت أشقى وأتعب من صغري، تعلمت إني مغلطش في حد، اتعلمت حاجات كتير جداً في حياتي أنت عمرك ما هتتعلمها طول ما أنت باصص للناس، فكر في كلامك كويس وكومنتاتك كويس قبل ما تكتبها، وقبل ما تقول إنك متعلم افتكر إن في "تربية وتعليم" يعني التربيه قبل التعليم".

وكان حمو بيكا قد تعرض لانتقادات عقب ما نشر على صفحته بالتزامن مع إعلان نتيجة الثانوية العامة، إذ كتب: "ألف مليون مبروك لإخوتي وحبايبي، اللي نجحوا في الثانويه العامة.. وإن شاء الله تحققوا كل أحلامكم، وهارد لك لكل اللي منجحوش قدامكم لسه بدل الفرصة ألف فرصة تعوضوا وتحققوا كل اللي بتتمنوه".

وفي سياق آخر، كانت نقابة المهن الموسيقية في مصر قد أمرت بإلغاء حفل حمو بيكا قبيل ساعات من انطلاقه، في أحد الشواطئ المخصصة للسيدات في منطقة مارينا بالساحل الشمالي، والتي أثارت الجدل مؤخرا.

وكانت شروط الحفل المخصصة للشاطئ، هي عدم دخول الرجال والسماح بدخول السيدات فقط، والتزام الحضور بالمواعيد المحددة للحفل واتّباع الإجراءات الاحترازية للوقاية من فيروس كورونا المستجد. 

جاء إلغاء الحفل لعدم حصول حمو بيكا على تصاريح رسمية من النقابة لمزاولة المهنة قبل إقامة أي حفل له، بالإضافة لقرار منعه من الغناء و4 آخرين من مؤدي المهرجانات من إقامة حفلات لحين تصحيح أوضاعهم.