تغزل الفنان المصري الشاب عبد الله مجدي الهواري، بوالدته النجمة غادة عادل، مشيرًا إلى أنها تتمتع بقبول كبير على الشاشة، وتمنى لها النجاح في فيلمها الجديد "الخطة العايمة".
وقال عبد الله في لقاء خاص مع موقع "فوشيا": "أحب أقول لماما إن شاء الله الفيلم ده يكسر الدنيا كالعادة، معظم أفلامك أو 90% منها ناجح، لإن عندها قبول وكاريزما عالية جدا مش بقول كده علشان والدتي، فعلا ما شاء الله عليها وربنا يخليها لي طبعا".
وبسؤاله عن رأيه في الجدل الذي يحدث حول أي صورة تقوم والدته بنشرها مع أبنائها، قال: "والله الناس بيشوفوا ماما لو وقفت جنبها هيقولوا إني أبوها مثلا، هي ما شاء الله شكلها صغير فهو السبب، إن أي حد مننا لما بيقف جنبها بيكبرها، رغم شكلها الصغير".
وتابع: "اللي يعرفني شخصيا يعرف إني ليس لي في الخناقات والحوارات، بحب أعيش حياة عادية مع كل الناس ومش بنفسن على حد الحمد لله، أي حد بيقول كلمة وحشة بقول شكرا وساعات مبردش وساعات بتعصب وأتنرفز جامد".
وعن انفصال والدته عن والده المخرج مجدي الهواري، قال: "في فترة خلافات بابا وماما، قابلت ناس كتير بيتكلموا في الموضوع وحياتي الخاصة، بس أنا حياتي الشخصية لا، لو عاوزين يسألوا عن أفلامي ومشاريعي أنا متاح، غير كده لا".
وعن ما إذا كان يشبه والدته أم والده أكثر، قال عبد الله: "أنا شبه بابا وماما، عيني خضرة زي ماما، وشكلي العام يدي على بابا".
وبشأن أعماله الفنية ومشروعاته الجديدة، قال: "أنا ممثل ومخرج، لسة مختارتش مجال معين منهم لغاية دلوقتي، عملت 3 أفلام، بشتغل على اتنين دلوقتي، واحد خلصت تصوير فيه، اسمه ضحكاية، والتاني لسة بنكتب فيه".
واختتم عبد الله الهواري حديثه لـ"فوشيا": "أتمنى يكون في تعاون جديد بين بابا وماما، لو مش في السينما أو التلفزيون ممكن يكون في المسرح، بابا بيعمل كايرو شو والناس كلها عارفين ده، أتمنى يتعاونوا مع بعض ده حلمي أكيد وبالمناسبة علاقتهم كويسة جدا ببعض ومفيش أي خلافات بعد الانفصال".
