ريم سامي: تشبيهي بمي عمر حاجة تفرحني..ومحمد بيتعامل معايا على إنه مخرج

 

كشفت الفنانة المصرية ريم سامي، شقيقة المخرج محمد سامي، عن كيفية تعامل الأخير معها، في مواقع التصوير، بعدما تعاونا في رمضان الماضي، بمسلسل "البرنس" بطولة النجم محمد رمضان.

وقالت ريم في لقاء خاص مع موقع "فوشيا" على هامش حضورها العرض الخاص لفيلم "الخطة العايمة": "في موقع التصوير محمد بيتعامل معايا على إنه المخرج وبس، مش أخويا خالص، أنا بحب أشتغل معاه جدًا، لإنه بيعرف إزاي يطلع أقصى حاجة عند أي ممثل".

وأضافت: "بستمتع بالشغل معاه جدًا، هو بيمسك اللوكيشن كويس أوي، بس حتى لو في حد غلط أو مش حافظ كويس مش بيضايقه بأي كلام، بالعكس".

وعن تشبيه الكثيرين لها بالفنانة مي عمر، زوجة شقيقها محمد سامي، قالت ريم: "كل الناس بتقول إني شبه مي عمر، دي حاجة بتبسطني جدًا، وممكن أشتغل مع مي وأخي محمد، وإحنا قبل كده اشتغلنا مع بعض في ولد الغلابة".

وواصلت حديثها بالقول: "كمان معنديش أي مشكلة إني اشتغل مع مخرج تاني غير محمد سامي، أنا اشتغلت قبل كده مع الأستاذة منال الصيفي، في مسلسل (للحب فرصة أخيرة)".

وعن إمكانية حصرها في أدوار الفتاة الرقيقة المغلوبة على أمرها، أجابت ريم: "على حسب العمل، محدش بيبتدي يعمل كل حاجة مرة واحدة، لازم خطوة خطوة، وهحاول إني أختار أدوار مختلفة علشان متحصرش في دور معين".

واختتمت ريم سامي بالحديث عن فيروس كورونا، قائلة: "خايفة وباخد بالي من كورونا، بس خلاص لازم نتعايش مع الوضع الحالي ولازم الحياة تستمر وترجع زي الأول".

يذكر أن ريم سامي تألقت في دور شقيقة محمد رمضان، بمسلسل "البرنس"، الذي حقق نجاحًا ساحقًا في موسم دراما رمضان الماضي، ونال نسب مشاهدة خيالية.

وشارك في بطولة مسلسل "البرنس" كوكبة من الفنانين، أبرزهم أحمد زاهر ومحمد علاء وريم سامي ونور اللبنانية ونجلاء بدر وعبد العزيز مخيون وإدوارد ورحاب الجمل وهو من تأليف وإخراج محمد سامي.

ويواجه محمد سامي من حين لآخر، اتهامات بمجاملة زوجته وشقيقته في أعماله الفنية، واهتمامه الزائد بهما وتمييزها عن باقي فريق العمل، الأمر الذي سبق وأن نفاه المخرج الشاب كليًا مؤكدًا أنه لا يجامل أحدًا، وأنه يحاول إظهار جميع النجوم المشاركين في أعماله، بنفس القدر من الكفاءة والقوة على الشاشة.