أعربت الفنانة المصرية بشرى، عن سعادتها بمشاركتها أبطال فيلم "الخطة العايمة"، الاحتفال بالعرض الخاص في دور السينما، مشيرة إلى أن الأمر يمثل مناسبة خاصة لها، كونها تحتفل -أيضًا- بعيد ميلادها.
وقالت بشرى في لقاء خاص مع موقع "فوشيا": "عيد ميلادي النهاردة وسعيدة إني بحتفل بيه بشكل غير تقليدي، أنا بحب السينما، هي عشقي وشغفي، جاية أدعم زملائي في فيلم الخطة العايمة".
وأضافت: "شهد رمزي المنتجة بتخوض التجربة في ظروف صعبة والسنة اللي فيها تحديات كتير خصوصا للسينما ودور العرض، وطبعا غادة عادل نجمة كبيرة وعلي ربيع دمه خفيف وعمرو عبد الجليل من أهم ممثلين مصر، وموهبة استثنائية، ومعتز التوني المخرج اشتغلت معاه قبل كده لما كان مساعد مخرج ولما بقى مخرج، جاية أشجعهم وأدعم السينما النهاردة".
وعن احترافها الغناء والتمثيل ودخولها مجال الإنتاج والدعاية والإعلان، قالت: "أنا معملتش غير إعلانين، واحد مع أحمد المهدي وواحد مع شريف صبري، وكان هدفي إني أشتغل مع المخرجين دول، مكنش هدفي موضوع الدعاية والإعلان".
وأردفت: "أنا مشواري طويل رغم صغر سني وعلى فكرة ويكيبيديا دايما بيكدب في سني، أنا سني مش زي ما مكتوب في ويكيبيديا".
وواصلت حديثها قائلة: "دايما بقول هو ده شغفي وعشقي، العالم كله بقى أداة واحدة عن طريق الشاشات والموبايل، بقت السينما والدراما والغناء والسوشيال ميديا بقينا نشوفها في الموبايل، أنا اشتغلت في كل المجالات دي وكمان الإذاعة والمسرح وغيره، وكل مجال لما بعلى فيه بيحسسني بتواضع أكتر وإني لسة مقدمتش كفاية".
وعن مهرجان الجونة والدورة القادمة منه، قالت بشرى باعتبارها أحد مؤسسيه: "عشقي للسينما حاجة وعشقي للجونة حاجة، فقررت أجمعهم مع بعض، مهرجان الجونة خدني كتير من التمثيل والغناء، لكن ده علشان هدف أسمى، إننا نخلق منصة ونخلق استمرارية للصناعة علشان نبقى متواجدين بقوة".
واستطردت: "السنة دي المهرجان هيبقى مختلف مش علشان حاجة، بس علشان العالم كله مختلف بسبب الكورونا، وإحنا شوفنا مهرجان فينيسيا والتجربة نجحت، وبناء عليه اتشجعنا أكتر إننا نخوض التجربة دي ونبقى أول مهرجان مصري عربي بعد الكورونا، وإن شاء الله يعدي على خير".
واختتمت: "الأهم من كده هي مسؤولية فردية، كل شخص مسؤول عن نفسه وعن الي حواليه، لا إدارة ولا مسؤولين ولا أي قرارات، الطبيعي إن كل واحد يحافظ على نفسه ويحافظ على الي جنبه بدون أي أنانية".
