قالت الفنانة المصرية منى ممدوح، إنها ستظهر بشكل مختلف تمامًا في فيلمها الجديد "لعبة شيطان"، المقرر طرحه في دور العرض قريبًا، لافتة إلى أنها سئمت من اعتمادها على جمالها في الأدوار التي تقدمها بالدراما والسينما.
وأضافت منى في لقاء خاص مع موقع "فوشيا": "ألعب شخصية لانا في الفيلم، مركبة وجديدة، اسم الفيلم (ساعة شيطان) أو (لعبة شيطان) بعد ما اتغير، عبارة عن لعبة شبيهة للألعاب اللي بتظهر على الانترنت وتتمنع بعد كده إنها تتلعب سواء لأطفال أو كبار، إحنا هنلعب حاجة شبه كده بس باختلاف الكتابة".
وتابعت ممدوح: "في شخصيات كبيرة وضيوف شرف أسماء كبيرة، هتفهمي من الفيلم إنه منقول في حتة تانية خالص، وحدوتة حلوة، موجود مثلا أستاذ باسم سمرة أول مرة أشتغل قدامه، بس إحنا اشتغلنا ولاد رزق 2 بس ممثلتش قدامه، وفي منذر الريحاني، نجم كبير علشان ييجي ضيف شرف في فيلم زي ده فأكيد في حاجة مختلفة".
وعن تغيير جلدها في الفيلم وعدم الاعتماد على جمالها، قالت: "أستاذ إبرام نشأت المخرج لما كلمني، لقيته بيفكر فيا إنه عاوز ينقلني من شخصية البنت الحلوة وعايزني أمثل بجد، يعني أكون بعمل حاجة جوة الفيلم".
وأكملت: "دايمًا بلاقي نفسي في الحاجات اللي زي دي، في حاجات فلتت مني زي كفر دلهاب مكنش كده، الصياد مكنش كده، بس هنا أنا مختلفة تمامًا، بظهر بشخصيتي العادية اللي هي منى ممدوح، بس باسم لانا وبعمل حاجة غريبة شوية وبحرض لحاجات ومش عايزة أحرق الفيلم".
وعن حقيقة وجود تشابه بين "لعبة شيطان"، وفيلم "ويجا" الذي كان من بطولة هاني سلامة وإخراج خالد يوسف عام 2005، قالت: "إحنا بعيد خالص عن فيلم ويجا.. أي حد هيغامر دلوقتي إنه ينتج فيلم مش هيغامر بقصة متقلدة، أنا لما بشوف فيلم في التلفزيون وشفت حاجة شبهه، هقلب القناة ومش هتفرج، ولو شوفتيه قبل كده وإنتي حباه مش هتشوفيه كتير برده".
وواصلت: "مبسوطة إني اشتغلت مع إبرام، كان بقالنا فترة عاوزين نشتغل سوا ومش عارفين فالحمدلله إننا اتجمعنا في عمل، صدقيني الفيلم ده غير".
واستطردت حديثها قائلة: "عايزة أبعد عن الشكل الحلو، كل الناس بتشوفني حلوة والحمدلله رب العالمين وبعد البيت الكبير ونجاحه والجزء الثاني والثالث، أستاذ محمد النقلي قالي يا منى إنتي في حتة تانية، إنتي آه شكلك حلو بس إنتي ممثلة كويسة، عاوزين نطلعك من الشكل الحلو، لإن الحلوين كتير وأنا وصلت لحتة إن الناس بتحبني فلازم أقدم حاجة جديدة وأبتدي أمثل بجد وألعب بعيد بقى وده اللي أنا بعمله في الفيلم ده".
وعن أعمالها الجديدة، قالت: "خلصت مسلسل سيت كوم اسمه (بيضة دهب)، بطولة هنادي مهنا، إسلام إبراهيم، صلاح عبد الله، إخراج مصطفى فكري، وده كوميديا بس، وبظهر بشخصية مختلفة عني، بس مغيرين شكلي شوية ويضحك".
وعن إمكانية دخولها في علاقة عاطفية خلال الفترة الحالية، قالت: "كان عندي تجربة فشلت بس إن شاء الله اللي جاي أحسن، بس لسة شوية".
وبسؤالها عن رأيها في الصور الأخيرة التي ظهرت فيها نادية الجندي كما لو أنها في العشرينيات من عمرها حسبما وصفها المتابعون، وأثارت جدلًا واسعًا في السوشيال ميديا، ردت منى ممدوح قائلة: "بحب نادية الجندي جدًا على المستوى الشخصي، واشتغلت معاها مسلسل أسرار، وقعدت معاها ومكنتش أعرفها عن قرب، هي بنوتة، يعني كبيرة سنًا بس صغيرة وطفلة في نفس الوقت، كإني قاعدة مع صحبتي، بقعد أتكلم معاها وأنا مبسوطة منها، الدماغ حلوة، لما بشوفها بنبسط، سيبك من تعليقات الناس، أنا لما بنزل أي صورة بلاقي بعدها 100 خبر ولو قعدت أركز هتعب، أنا بحبها واللي يقول يقول، مهما عملت هي نادية الجندي".
وعن ظهورها مؤخرًا مرتدية المايوه في إحدى الصور التي نشرتها عبر حسابها الشخصي، قالت منى: "لما بكون في الساحل وأجي ألبس أي حاجة لازم يكون في تحتها مايوه، أنا مش بتصور بالمايوه ومتصورتش بمايوه صريح، في ناس من زمايلي بيعملوا كده بس أنا معملتش كده وجالي أدوار في أفلام كتير من زمان وبطولة، ورفضت أطلع بمايوه صريح".
يذكر أن فيلم "لعبة شيطان" بطولة الفنانين باسم سمرة، إسلام إبراهيم، محمد عز، مصطفى أبو سريع، مي القاضي، أحمد سلطان، نانسي صلاح، منى ممدوح، منة بدر تيسير، ومن تأليف أحمد عثمان، وإخراج إبرام نشأت.
وينتمي الفيلم إلى نوعية التشويق والإثارة، وتدور أحداثه حول مجموعة شباب تدفعهم الظروف لمصير مجهول يتحكم به شيطان من الإنس متمثل في تطبيق إلكتروني خبيث يتسلل إلى هواتفهم الذكية ويسيطر على حياتهم ويسيربهم إلى الهاوية.
