حرص عدد من مشاهير الفن في مصر والوطن العربي، على تهنئة الجمهور بمناسبة عيد الحب، الموافق 14 فبراير من كل عام، حيث وجه بعضهم الرسائل للاحتفال مع محبيهم.

والتقى "فوشيا" بعدد من النجوم لتوجيه رسائل بمناسبة عيد الحب، ففي البداية قالت الفنانة اللبنانية رولا سعد: "كل عيد حب وإنتم بخير والعالم كله بخير وإن شاء الله نخفف ضغط ونميمة وخناق".

وعن الشخص الذي سوف تحرص على منحه هدية في هذه المناسبة، قالت: "ممكن أجيب لكتير عالم بس أكيد بجيب لخطيبي، ما بعرف أجيب إيه بصراحة، لو ممكن تغششوني".

فيما قالت الفنانة المصرية لقاء الخميسي: "عيد حب سعيد لكل الناس اللي قلبها حلو واللي جواها محبة، يا رب دايما كويسين وتحققوا كل اللي نفسكم فيه".

ومن جانبه قال الفنان المصري الشاب محمود حجازي: "إنك تلاقي حد بيخاف عليك ويدعمك ده أحلى حاجة، اللي يستحمل المشاكل، مش هتلاقي حد مفسر معنى الحب بشكل واضح، لإن الحب ده شيء معقد جدًا".

أما الفنانة المصرية منة فضالي، فقالت لـ"فوشيا": "بجيب لماما هدية في عيد الحب وبجيب لنفسي ساعات، ممكن أروح أشتري ورد وأنقي الورد لنفسي، وببقى فرحانة أوي بده".

وأكملت: "معنديش حبيب الفترة دي علشان أجيب له ويجيب لي هدية، بس الواحد مبقاش مستني خاتم سوليتير والكلام الفاضي بتاع الناس ده، الهدية بتفرحني لمجرد إن اللي قدامي افتكرني".

كما علق الفنان المصري محمد أنور، قائلًا: "بهني كل الناس وكل عيد حب وإنتم طيبين وكويسين ويا رب نفضل دايما نحب بعض، واللي بيحب حد ونفسه يرجعله يا رب يرجعله، وكل سنة وإنتم طيبين".

فيما مازح المطرب مصطفى شوقي، جمهوره قائلًا: "أنا هجيب لمراتي هدية، بفكر أجيبلها (عرقسوس)"، في إشارة إلى أغنيته الشهيرة المسماة بهذا الاسم.

ووجه مصطفى رسالة للجمهور قائلًا عبر "فوشيا": "متشكر على محبتكم والمحبة دي هي الي بتديني طاقة وإحساس بالنجاح".

كما هنأ الفنان المصري محمد علي رزق، الجمهور بمناسبة عيد الحب، قائلًا: "بقول للناس كل سنة وإنتم طيبين، لو أنا مرتبط بحد فعيد الحب بالنسبالي هيكون اليوم اللي ارتبط فيه بيها، أنا غير معترف بيوم عيد الحب في العموم، ولكن هي فرصة نعبر فيها للناس الي بنحبهم عن مدى حبنا ليهم".