تحدث الفنان المصري محمود حجازي، عن دوره في فيلم "في عز الضهر" الذي يشهد أول بطولة للنجم العالمي ومواطنه، مينا مسعود، في السينما المصرية.

وقال حجازي في لقاء خاص مع موقع "فوشيا" على هامش المؤتمر الصحفي الخاص بالإعلان عن تفاصيل الفيلم: "متحمس جدًا لـ(في عز الضهر)، خصوصًا لما عرفت إنه بطولة مينا مسعود، أول عمل ليه في مصر".

وأضاف: "لما قرأت سيناريو الفيلم انبسطت أكتر، فيه شوية حاجات حلوة أوي، بيتكلم عن الهوية، ودوري موضوع تاني".

وتابع محمود: "الشخصية اللي هجسدها اسمها ديفو، مش أجنبي، هو مصري مغربي، اتعرفت على مينا مسعود في بلد ما، وبقينا أصحاب وبنعمل مهمات صعبة مع بعض وفي رحلة ما بينا على مدار أحداث الفيلم، هيتخللها مشاهد أكشن ولايت كوميدي".

وأكمل حجازي حديثه عن الفيلم قائلًا: "حابب الدور جدا، مختلف والمخاطرة إني بقدم لغة جديدة بحاول أضحك بيها وأعمل أكشن بيها، الأدوار اللي فيها حاجة مختلفة وبتغير جلدي بتبقى مبهرة، أنا من الممثلين الي بحب الأدوار دي وبطلع كل طاقتي فيها، والتغيير متعة الفن والتمثيل".

وعن دراما رمضان وما إذا كان سيشارك بعمل جديد، قال الفنان الشاب: "في ظهور خاص في رمضان، مشهد أو حاجة، أنا عاوز أبعد شوية عن الدراما، الفترة الي فاتت عملت مسلسلات كتير".

واسترسل: "عاوز أروح للسينما وأشتغل على نفسي أكتر، يبقى في هدوء فني وأعيد حساباتي وأطور من نفسي، عاوز أتمرن وأشوف آخد كورسات في إيه، لازم أقف وأختار كويس لإني اتحطيت في منطقة الناس مستنية مني يا إما هتشوفني حلو ومكسر الدنيا يا إما هكرر نفسي".

وعن الصور ومقاطع الفيديو التي يشاركها مع جمهوره من خلال صفحاته الشخصية، من داخل "الجيم"، قال: "كل أملي إني أشوف نفسي فورمة كويسة، حبيت أركز على شكل جسمي، لازم يكون في روتين يومي يشمل الرياضة، خصوصا إن في مشاهد أكشن وسينما، فلازم أرضي الناس".

واختتم: "لو يوم منزلتش أتمرن بكون مضايق، بطلع طاقة عندي في اليوم، لو مبسوط انزل اتمرن، لو محبط انزل اتمرن، هتفرق كتير".