وجهت الفنانة المصرية داليا مصطفى، رسالة إلى زوجها الفنان شريف سلامة، بمناسبة عرض فيلمه الجديد "عمار" في مهرجان القاهرة السينمائي بدورته الـ42 ومنافسته على الجوائز.

وقالت داليا في لقاء مع موقع "فوشيا"، على هامش مشاركتها في مهرجان القاهرة: "عاوزة أقول لشريف جوزي حبيبي يا رب بالتوفيق والنجاح وإن شاء الله فيلمك الجديد يكسر الدنيا".

وأضافت مصطفى: "أتمنى أكون معاه في أي عمل فني، ولو اتعرض عليا حاجة كويسة هنقدمها مع بعض أكيد، وبإذن الله ده يحصل قريب".

وعن كيفية تعامل شريف سلامة مع الشخصية التي لعبها في الفيلم، خاصة أنه ولأول مرة يقدم فيلم رعب، قالت: "أنا كنت عايشة في حالة رعب، لإنه من نوعية الممثلين اللي لما بيمثل دور بيأثر عليه وشخصيته بتظهر عليها التأثير ده في البيت، هو أول فيلم رعب بالنسبة له، فكان قلقان جدا".

وأردفت: "في يوم وهو بيصور وقع على رقبته لوح زجاج كبير، ورقبته اتقطعت بجد وخد كذا غرزة وباينة لغايت دلوقتي العلامة عنده، فهو تعب أوي".

وعما إذا كانت مشاركتها في بطولة فيلم رعب أيضًا وهو "قبل الأربعين" في نفس الوقت الذي يشارك زوجها بـ"عمار"، صدفة أم لا، قالت: "الموضوع جه صدفة بحتة، إحنا الاتنين مكناش بنصور في نفس الوقت، بس الواضح إن العملين هيعرضوا في وقت واحد".

وعن دخولها في أكثر من وعكة صحية مؤخرًا، قالت: "دخلت المستشفى 3 مرات، مرة الأحبال الصوتية ومرة الغدة الدرقية، ومرة حاجة تانية، ومش بشوف إن ده حسد أو اي حاجة، أكيد في سبب من عند ربنا".

وبِشأن أعمالها الجديدة، قالت داليا مصطفى: "مظنش إني هقدم حاجة في رمضان، بس في مسلسل يوم وليلة، أنا وأحمد رزق هيتعرض قريب".

واختتمت بالحديث عن إطلالتها، قائلة: "انا بحب الأحذية جدا جدا، وعاجنبي شكل الفراشة اللي أنا لابساه ده، والفستان من ستايليست حسن مصطفى، والمكياج أنا الي عاملاه، بس برده معايا إيهاب محروس الماكيير، بس المرة دي كنت مستعجلة جدا فأنا الي عملت الميك أب لنفسي".