أبدى الفنان المصري تامر فرج، سعادته بردود فعل الجمهور على مسلسله "الآنسة فرح" الذي بدأ عرض الجزء الثاني منه منذ شهر تقريبًا، مشيرًا إلى أنه كان يتوقع أن يحقق نجاحًا كبيرًا مثلما حدث في الجزء الأول.

وقال تامر في لقاء خاص مع موقع "فوشيا" على هامش العرض الخاص لفيلم "خان تيولا": "الحمدلله على نجاح مسلسل الآنسة فرح، كنت متوقع إن الجزء التاني هيتفوق على الأول اللي اتعرض السنة الي فاتت، والحمدلله ردود الفعل كانت كويسة".

وأضاف: "العلاقة الغريبة اللي بين القبطان ورانيا يوسف في المسلسل، هتتحول تماما، الناس مش هتتخيلها والأحداث هتطور بشكل كبير".

وعن السلسلة التي ترتديها زوجته رانيا حول رقبتها، وتحمل كلمة "ست الستات"، قال تامر: "أنا اتجوزت 6 مرات، رانيا هي رقم 6، واكتشفت إنها ست الستات، فكان لازم أعملها الهدية دي".

ومن جانبها، قالت زوجته لـ"فوشيا": "أنا متفهمة هو ليه اتجوز 6 مرات، مش حبًا في الزواج أو الستات، هو كان بيدور إنه يعيش حياة سعيدة صح بس مش أكتر".

وعن المفاجآت التي يحضرها خلال الفترة المقبلة، قال: "الفترة دي هركز عالكتابة شوية، علشان السنة الجاية ناوي أدخل المجال الروائي".

واختتم تامر فرج حديثه قائلًا: "هتكون أول تجربة ليا، حاجة كنت كاتبها قبل كده هنزلها ككتاب، وبعد كده هنزل برواية اسمها ضرب الأربعين".

وكان تامر فرج، قد تحدث في لقاء سابق مع "فوشيا" عن مسلسله "الآنسة فرح"، الذي يعرض على منصة "شاهد"، قائلًا: "أنا كنت عارف إن في أجزاء تانية، لإننا اشترينا الفورمات من برة، بـ 4 أجزاء، ومضينا على 4 أجزاء، ولكن هل هينجحوا ولا لا؟! ده اللي في علم الغيب".

وتابع: "المسلسل فكرته جريئة شوية، ورغم إنه أجنبي إلا إنه مناسب للثقافة المصرية، لإن العمل كله بيتكلم عن بنت من زمان مامتها وجدتها بيحذروها إنها لازم تخلي بالها ولازم تفضل عذراء، ودي الحاجات الي احنا اتربينا عليها".

وأكمل: "لو في شوية اختلافات بين المسلسل الأصلي والعمل بتاعنا، في بعض الحاجات الثقافية، إحنا تلافيناها، زي مثلا الاتنين الي بيعيشوا مع بعض من غير جواز، ده إحنا شلناه خالص وغيرناه".

وواصل فرج حديثه قائلًا: "الجزء التاني إتضاف ليه ستات أكتر، أنا محصور دايمًا في أدوار الإغراء، السنة دي شخصية ماجد الألفي في المسلسل وعلاقته المتوترة دايمًا مع دلال اللي هي أم فرح، ما بين إن هما يسيبوا بعض ويقربوا من بعض ويتجوزوا، وبعد كده بيدخل على ماجد سيدات أخريات وحالات جواز أخرى والموضوع بيكبر".