هاجم الفنان المصري صبري فواز، اهتمام وسائل الإعلام ورواد السوشال ميديا، بإطلالات الفنانات في مهرجان الجونة السينمائي، دون التركيز على الأفلام التي يتم مناقشتها والندوات الفنية التي تقام ضمن فعاليات الدورة الرابعة.

وقال فواز في لقاء مع موقع "فوشيا": "مينفعش يبقى مهرجان بالضخامة دي وجايب أفلام رائعة من كل مكان في العالم، بعد ما بتفرج على أي فيلم بكون مستمتع وسعيد بالجرعة الفنية اللي أخذتها، وفي ناس في وسط ده كله بيلبسوا أزياء وبيظهروا على السجادة الحمراء، أقوم سايب الأفلام وأركز بس مع الناس ولبسهم، ده مش منطق خالص".

وأضاف: "يعني مثلا تبقي جايبة الدرجات النهائية وناجحة بامتياز، أقوم أسيب ده كله وأقول لا أصل شعرها مكنش متسرح كويس، هل ده معقول؟!".

وتابع: "في شغل كتير مهم في المهرجان، منصة الجونة بتساعد المشاريع الجديدة إنها تنتج، في حاجات بتحصل حلوة جدا، أفلام وندوات، مينفعش نسيب ده كله ونمسك في الفساتين وأشكالها والإطلالات".

وأردف: "في كل المهرجانات موجودة فكرة التريند والبحث عنه بقوة، بس كمواطن أو صحفي أو إعلامي، شوف اللي إنت عاوزه وعلق عليه، بس متديهاش أكبر من حجمها".

وعن اهتمامه بمظهره بشكل دائم، علق صبري فواز ساخرًا: "لا مش هتجوز تاني أكيد، مفيش حد يعملها مرة ويروح يعملها تاني، ميبقاش عاقل، الفنان لازم يكون دايما في حالة كويسة، لإن في أدوار مختلفة بتجيلي فأكيد لازم أبقى في أحسن شكل".

وأكمل: "المهرجانات فرصة إننا نشوف النتاج الفني للزملاء في بلاد أخرى، ونتواصل مع الزملاء ويحصل تبادل خبرات ما بينا".

وعن تداول بعض الجمل الحوارية التي أطلقها في أعماله الفنية، عبر منصات السوشيال ميديا، قال: "بنبسط جدا لما الناس تكلمني وتقولي الإفيهات الي بقولها في الأفلام، زي (أنا يا بنتي) و(جمل يا عم الحج)، وكل إفيهات شخصية عرابي الديب في فيلم (كلمني شكرا)، الحقيقة قليل جدا في السينما لما يبقى في جمل في الأفلام يتم استخدامها في الحياة العادية".

وعن تغزله الدائم في أبنائه عبر حساباته الشخصية، خاصة ابنته، قال: "طبعا ربنا يحمي أولادنا هما الدنيا كلها، لما أشبع بنتي حنية ودلع، تتربى شبعانة متقعش لأي حد يقولها كلمتين حلوين، هتبقى عارفة قيمة نفسها، لازم الأب يشبع بنته حنية وأحضان علشان لما تكبر تختار شريك حياتها بهدوء مش باحتياج".

واختتم صبري فواز حديثه، بالكشف عن سر خاتم "مفتاح الحياة" الذي يرتديه، فقال: "الخاتم ده أنا على طول لابسه، بحبه جدا وبحب الثقافة المصرية ومتمسك بيها وأتمنى ترجع تاخد حقها جوانا تاني".