علقت الفنانة المصرية زينب غريب، على إطلالتها المثيرة للجدل، التي ظهرت بها في حفل افتتاح مهرجان الجونة السينمائي، حيث ارتدت فستانًا مكشوفًا من الظهر ومنطقة البطن، لونه "موف" تسبب في سخرية واسعة منها وهجوم ضدها.

وقالت زينب في لقاء مع موقع "فوشيا": "أنا عرفت إن الفستان بقى اسمه بونبوني، أنا كنت مسمياه أورجواني، بس إظاهر إني كنت عميقة أوي".

وعن اللوك الذي ظهرت به في ثاني أيام المهرجان، قالت: "اللوك اللي أنا عاملاه بيعبر عن إني إزاي وإنت رايح تشوف فيلم إنك تكون مركز جدا، وأنا حابة إني على قد ما قدر أعكس الشخصيات اللي عندي، أنا حاسة إني عندي شخصيات كتير أوي، واللبس بيعكس حاجات، واللبس حاجة من ضمن الحاجات اللي أحب أتكلم بيها مع اللي قدامي".

وأردفت: "أنا مش بحط ميك أب ولا بعمل شعري، لإن الفكرة إني أحس من جوايا إني جميلة بيني وبين نفسي، وأكون مبسوطة، الموضوع بسيط أوي".

وواصلت حديثها قائلة: "أنا بحس إن الاختلافات والتنوع حاجة بتخلي فيه تميز دايما، فأنا بعتبر نفسي حاجة مختلفة بس على طبيعتها".

وعن نجاح مسلسل "بـ100 وش"، الذي شاركت فيه ضمن فريق العمل مع آسر ياسين ونيللي، قالت: "بعتبر أسرة بـ100 وش عيلتي، اللي حصل إننا كنا مع بعض، اتجمعنا ولغاية دلوقتي عندنا جروب وبنتكلم مع بعض، المهرجان ده هيتخاف عليه قريب، هننصب نصبة فنية في المهرجان".

وعن النجم الذي تتمنى الوقوف أمامه، قالت: "بصراحة مش ده اللي في تفكيري، أنا بدور على القصة وإن يبقى في تواصل حقيقي، بدور على مساحة أكون فيها صادقة والشخصية توصل للناس، ده المعيار الحقيقي بالنسبة لي".

وحضرت زينب غريب العرض الخاص لفيلم The Furnace الذي يشارك في بطولته الفنان المصري الشاب أحمد مالك، بإحدى قاعات مهرجان الجونة السينمائي.

وجسدت الفنانة المصرية زينب غريب شخصية أحد أفراد عصابة "عمر وسكر" في مسلسل بـ"100 وش"، الذي تم عرضه في رمضان الماضي، وحقق نسب مشاهدة عالية ونال نجاحًا ساحقًا إلى جانب مسلسل "البرنس" لمحمد رمضان في دراما الشهر الكريم.