كشفت الفنانة المصرية ندا بهجت، عن الطريقة التي اتبعتها لإخفاء حملها، أثناء تصويرها مسلسل "ليالينا 80" الذي تم عرضه في رمضان الماضي.

وقالت ندا في لقاء مع موقع "فوشيا": "أنا كنت حابة أقول إني حامل بس لما أكون قربت أولد، كنت بصور ليالينا 80 ومسلسل يا أنا يا جدو وأنا حامل بس كنت في بداية الحمل".

وأضافت: "على قد ما أقدر كنت بحاول أحافظ، بس أنا كنت عاملة عملية في رجلي فالناس في التصوير عارفين إني مينفعش حد يدفعني جامد أو يحصل أي عنف من أي نوع، فالموضوع ده كان مغطي على الحمل، ولكن دلوقتي خلاص فاضل حوالي أسبوع وأولد، فعادي الناس تعرف، وكمان مهما حاولت أداري مش هعرف".

وأردفت بهجت: "أنا حامل في بنت، اسمها هيكون (لوليا) يعني لؤلؤ البحر، ودلعها هيبقى لولي، واخترت فستان أبيض في تكريمي بمهرجان همسة علشان يكون بشرة خير قبل الولادة، رغم إني بحب الألوان الغامقة".

وعن كواليس مسلسل "ليالينا 80"، قالت: "أول مرة أتعامل مع الأستاذة صابرين، سعيدة جدا بالتعاون معها، هي جميلة جدا وهي من نفسها وأنا مكنتش أعرفها على المستوى الشخصي، جت لحد عندي وشكرت فيا بشكل أنا فرحت بيه أوي، لإنها فنانة قديرة وعظيمة، فلما تجيلي وتقولي إني كويسة دي شهادة كبيرة أوي".

واستطردت: "مسلسل ليالينا 80 اللي رشحني ليه المؤلف أحمد عبد الفتاح وهو اللي رشحني في مسلسل بحر، وأنا بهديه التكريم الي حصلت عليه من مهرجان همسة، لإنه سبب في إن الناس تحبني في المسلسلين".

وواصلت حديثها قائلة: "والأستاذ المخرج أحمد صالح المخرج العظيم هو سبب نقلاتي الكبيرة اللي حصلتلي من بعد مسلسل (أيوب) لإن هو كان مخرج المسلسل ده برده، وأنا بعتبره أبويا الروحي".

وعن النصيحة التي تقدمها للحوامل للحفاظ على رشاقتهن، قالت الفنانة الشابة: "أنا باكل كويس ولكن جسمي مش بيتخن، لإني رياضية أصلا، فاتعودت إني مهما أكل مش بتخن، وعموما مينفعش ست حامل متاكلش، فأكيد مش هنصح الحوامل إنهم مياكلوش".

واختتمت: "كنت بمارس رياضة السباحة، يوجا لا بصراحة، وبعد الولادة لو تخنت إن شاء الله هعمل رجيم، وأهم حاجة في الدايت الابتعاد عن السكر تمامًا لإنه أكتر حاجة بتتخن".