كشفت الفنانة المصرية هبة عبد الغني، إنها واجهت انتقادات حادة وسبابًا من قبل الفتيات على منصات التواصل الاجتماعي، بسبب دورها في مسلسل "فرصة تانية" الذي عرض في شهر رمضان الماضي، وهو من بطولة الفنانة ياسمين صبري، حيث تم وصفها بأنها "خطافة رجالة".

وقالت هبة في لقاء مع "فوشيا": "شخصية صافي اللي جسدتها في (فرصة تانية) كانت من بداية المسلسل لغاية الحلقة 15، بتحب مديرها وهو كان راجل متزوج وهي مش بتبطل تقوله إنها بتحبه وتجيبله هدية في عيد ميلاده، فاستلموني في السوشال ميديا وجروبات البنات، اتمرمط وقالوا إني خطافة رجالة".

وأضافت: "في الأول لما كانوا بيشتموني أنا مش صافي، اتخضيت جدًا وكلمت المؤلف محمد سيد بشير وقولتله إنهم بيشتموني أنا كهبة مش صافي، وأنا ذنبي إيه، وهو قال لي إني كده نجحت ومبروك".

وعن رأيها في التعاون مع ياسمين صبري، قالت: "ياسمين صبري قمر ربنا يحميها، أمورة شكلًا وطباعًا وأخلاق وروحها حلوة، هي في الحقيقة دمها خفيف وبسيطة جدًا وذكية جدًا جدًا وابتسامتها وطلتها حلوة".

وأكملت: "رغم كل التعب من التصوير والإجهاد والضغط، عمرها ما دخلت موقع التصوير وهي متعصبة أو مكشرة، بالعكس دايمًا بتضحك ومشاعرها طبيعية وعلاقتها كانت كويسة بكل الناس".

وعن الجدل الواسع الذي أثير حول السيارة الباهظة التي منحها رجل الأعمال أحمد أبو هشيمة كهدية لزوجته ياسمين صبري، قالت هبة: "موضوع العربية اللي أثار الجدل ده، بعتبره نفسنة من الناس اللي بتتكلم عنه، دي مش مشكلة ياسمين صبري، وربنا بيدي كل واحد على قد اللي شايله في قلبه".

وبشأن الأدوار الفنية الغريبة التي تقوم بتجسيدها مؤخرًا، قالت: "الأدوار الشائكة دايمًا هي الي بتجيلي، مش أنا اللي بسعى ليها، وبحضر دلوقتي لمسلسل رعب، هجسد فيه دور ساحرة وهيتعرض على إحدى المنصات الإلكترونية".

وواصلت حديثها قائلة: "المنصات الإلكترونية تعتبر من أدوات العصر اللي بقت متاحة بقوة دلوقتي، والجيل الجديد بيتابع المنصات دي، لأنها بقت أسرع وأسهل وسيلة للمشاهدة".

وبسؤالها عن رأيها في وصف الفنان محمد رمضان بـ "مايكل جاكسون العرب" كما صرح رجل الأعمال نجيب ساويرس: "من وجهة نظري، شايفة إن رمضان مش مطرب في الأساس، بس خلينا نقول إن في السنتين اللي فاتوا أكتر حفلات كان فيها إبهار وشو زي البي كانت في مدينة العلمين الجديدة، كانت حفلات محمد رمضان، إبهار ميقلش حاجة عن مايكل جاكسون وبيانسيه والنجوم الأجانب اللي عملوا حفلات في الدول العربية، فيمكن رجل الأعمال نجيب ساويرس عنده حق في تصريحه".