أعربت الممثلة المصرية الشابة رحمة أحمد فرج التي تجسد شخصية "مربوحة" في مسلسل "الكبير أوي 6"، عن سعادتها بردود الأفعال بين الجمهور والنجوم حول شخصيتها في العمل الدرامي الكوميدي.

وخطفت رحمة الأضواء بعد مشاركتها في الجزء الجديد لـ"الكبير أوي 6" بطولة الفنان أحمد مكي، بسبب أدائها المميز، وتنبأ لها العديد من المتابعين والنجوم مستقبلًا ناجحًا في عالم الفن.

وكتبت رحمة أحمد فرج بعد أن شاهدت ردود الفعل عليها: "أنا مش عارفة أعبر عن احساسي بالامتنان.. الحمد لله والشكر لله.. أي حاجة حلوة حصلت أو اتقالت لي ده كرم كبير أوي من ربنا يمكن أكبر من اللي استحقه.. عاوزة اقول 3 نقط".

وقالت الممثلة الشابة: "الأولى هفضل أقول البوقين دول كل ما حد يشاور النقطة دي إن فنانة زي دنيا سمير غانم لا تقارن بأحد.. أنا مش حد خالص.. أنا من فانز دنيا سمير غانم.. لأن لو اتحطينا في مقارنة من المؤكد اني انا اللي هبقى خسرانة".

وأضافت: "الثانية، بعد توفيق ربنا.. إن فنان زي أحمد مكي يدي مساحة لحد يقول حاجة، دي مابتحصلش من أي فنان موجود على الساحة.. الراجل ده عنده اللي يكفيه وزيادة إنه يسيب فنان قدامه يقول وهو سايب إيده.. مهما اتكلمت عنه مش هوفيه حقه فنيا ولا إنسانيا.. المبدع أحمد الجندي مايتخيرش عن مكي.. يسيبك تقول.. ويعليك.. ويركب لك شغل.. وذكي يعرف يطلع ضحك من أي شخصية ويحطها في مكانها الصح".

وواصلت في رسالتها: "الثالثة ليك انت يا حبيب قلبي.. اخويا الكبير الداعم المستمر بكل الطرق.. صادق في فرحته.. أنا مهما حكيت على اللي عملته معايا عشان أوصل اني ابقى في عمل من أهم الأعمال في رمضان مش هكفي فيك كلام.. شكرا أحمد أمين الأخ والفنان والإنسان انك دايما جنبي.. أحمد أمين، أحمد مكي.. أحمد الجندي.. انتو مكسب لأي فنان ولأي شخص وبشكر ربنا دايما ان ربنا كتبلي اني اعرفكم.. وشكرا لأي حد دعمني حتى لو بكلمة كويسة وبالأخص صلاح الدالي.. فنان هياخد حقه كويس جدا ويستاهل اكتر بحبك يا صلوحة.. شكرا لأي حد وقف جنبي واللي اداني ضهره وربنا لأوريك".

وتلقت الفنانة الدعم من النجوم أبرزهم أحمد مكي الذي أعاد نشر عدد من مشاهدها بالحلقة الماضية من المسلسل، عبر حساباته على مواقع التواصل الاجتماعي.

كما نشر الفنان أحمد أمين مجموعة من التغريدات التي تشيد بأداء رحمة، فيما علق على تغريدة أخرى تؤكد أنه هو من قام باكتشاف الفنانة الشابة في أحد برامجه وقال: "هي اللي اكتشفتني".

مسلسل ”الكبير أوى“ من بطولة أحمد مكي، رحمة أحمد، محمد سلام، بيومي فؤاد، هشام إسماعيل، سما إبراهيم، محمد أوتاكا، ليلى عز العرب، مصطفى غريب، حسن القناوي، علاء زينهم، حسين أبو حجاج، وضيوف الشرف ماجد الكدواني، حمدي الميرغني، نرمين الفقي، وأسماء جلال، وسليمان عيد وآخرون، وتأليف مصطفى صقر، وإخراج أحمد الجندي.