أعلن إيهاب صالح، مدير أعمال الفنانة المصرية شيرين عبدالوهاب السابق، عن توليه إدارة أعمال النجمة الشابة كارمن سليمان، التي وصفها بـ"المستقبل" و"الميجاستار القادمة من مصر"، وذلك بعد يومين على انفصاله عن الأولى.

جاء ذلك في تغريدة عبر حسابه في موقع تويتر، قال فيها: "سعيد وبتشرف جدا أني أعلن إن من النهاردة مسكت رسميا إدارة أعمال النجمة كارمن سليمان. كارمن حد موهوب فوق الطبيعي، شخصية في منتهى الجمال والرقي".

وأضاف صالح: "من وجهة نظري هي المستقبل عشان عندها كل الإمكانيات وهي عارفة إني (معجب) كبير ليها من قبل مشتغل معاها فعلا. كارمن إن شاء الله الميجاستار القادمة من مصر للكل الفترة الجاية وافتكروا كلامي ده كويس".

وواصل "طول حياتي بحب التحدي والحمد لله بكرم وتوفيق من ربنا كبير دايما بكون قد التحدي. شكرا على كل الدعم من كل الناس وكل الامنيات الجميلة الفترة إللي فاتت وأللى جاي إن شاء الله. املى فيكم كبير بعد ربنا سبحانه وتعالى".

ووجه صالح رسالة إلى جمهور كارمن سليمان، مؤكدا أن الفترة القادمة ستحمل أخبارا سارة لهم، وقال "لجمهور كارمن بقي، الكل يجهز نفسه كويس، عشان إن شاء الله في اخبار كتير حلوة، وجامدة قريبا ويا رب ابقى عند حسن ظنكم".

إيهاب صالح ينفصل عن شيرين عبد الوهاب

وكان إيهاب صالح أعلن اليوم الاثنين الموافق الـ 29 من مايو/ أيار، عن مغادرته منصبه كمدير لأعمال شيرين عبد الوهاب، عقب الحفل الغنائي الذي أحيته في جدة مساء الأحد الماضي.

وكتب إيهاب صالح عبر حسابه بـ"تويتر": "جمهور شيرين العظيم الحمد لله على نجاح حفل جدة كما كان متوقع، وده العادي بتاع شيري في أي حفلة، أجلت الإعلان بالقرار ده لحد بعد الحفلة، وحابب أشكركم جدًا على كم الدعم الرهيب في خلال الفترة أللى فاتت ليها في المقام الاول، وطبعا بعد كدة ليا."

وأضاف: "قررنا إن من الأفضل لينا إن نحط صداقتنا والعشرة قبل أي حاجة، وإني ابتعد عن إدارة أعمالها، وده أكيد لمصلحة الطرفين ولينا اسبابنا، مبروك وشكرا يا شيري من كل قلبي ويا رب اكون كنت على قد وعدي وكلمتي ليكي، أني دايما في ضهرك والحمد لله الدنيا دارت من أول وجديد وتكسري الدنيا حفلة بعد حفلة، وخلاص أهو الالبوم على أبواب، ومتأكد إنه هينجح نجاح غير عادي".

وتابع: "فرحان بشكل ملوش وصف بنجاحك، ورجوعك بالقوة دي وده إللي اتعودنا عليه منك طول السنين دي، أنا كدة كدة دايما موجود زي مانتي عارفة، وربنا يديم كل أللى بينا على خير وأسف لو في أي لحظة كنت قصرت معاكي باي شكل، أحب اشكر كمان جمهورك اكيد إللي مشوفتش منوا غير كل خير وحب، شكرا بجد من كل قلبي، طبعا وأكيد شكر كبير لسيادة المستشار تركي ال الشيخ (أبو ناصر) على كم الدعم الكبير منوا، بمجرد إنه شاف صورة رجوعك للاستوديو وقد إيه كان مهتم بشيرين، ومقدر قيمتك وتقديرك بشكل يليق بيكي صوت إحساس العرب وده مش غريب عليه، ودايما في ضهر كل الفنانين العرب كدة كدة، دي شهادة حق لازم تتقال.

واختتم إيهاب صالح: ربنا دايما يحبب فيكي خلقه، ويبعد عنك أي شر بكل أشكاله ويكتبلك السعادة، أتمنى التوفيق لمديرين الأعمال الجايين، وادعمهم دايما بأي شكل أكيد عشان تفضلي دايما على القمة.