علق الموسيقار المصري حلمي بكر، على هجوم نديم نجل الفنان الليبي حميد الشاعري؛ بسبب انتقاد الأول الدائم لوالده.
وقال بكر في تصريح لـ"فوشيا"، إن حميد الشاعري الحالي غير حميد الشاعري الذي قدم الموسيقى قديما، حيث أصبح اليوم يتحدث عن حياته الشخصية أكثر من فنه.
وأضاف الموسيقار أنه ليس من الاحترام أن ينتقد نجل الفنان حميد الشاعري شخصية مثله، ويستهزأ به، قائلا: "أنا ممكن أقدم بلاغ للنائب العام بالسبق والقذف ده".
وكان نديم الشاعري، نجل الفنان حميد الشاعري، قد هاجم الملحن حلمي بكر؛ قبل ساعات قليلة بسبب هجوم الموسيقار على والده في البرامج التلفزيونية.

وكتب نجل حميد الشاعري عبر "فيسبوك": "أستاذ حلمي لو محتاج مساعدة ماديا أو نفسيا الكابو مش حيتاخر عليك لكن ما ينفعش كل ما تتزنق تروح برنامج تجيب سيرة حميد الشاعري.. اللي للأسف تاريخك ميجيش تمن تاريخه ولا فنيا ولا أخلاقيا للأسف 30 سنة من عمري ما بيعملش حاجة في حياته غير التقليل من الناس، ومن الفنانين ومن أعمالهم".
وأضاف: "أوعى حضرتك تفتكر إنك محطوط في خانة الإنسان المحنك، لا للأسف أنت عبرة لكل نفسية فاسدة متناهية الصلاحية فنيا وأخلاقيا، فرق التربية كبير أوي بينك وبين الكابو حتى في الفكر الموسيقي والمعاملة مع الناس، والكابو كبير مقامه ومش بيرد عليك عشان هو أكبر من كده وأكبر منك بالذات ودايما بيقولي ما تردش على حد، لكن ولاده كبرو ومش حيسمحو إنك تقطع في أبوهم".
وتابع نجل الفنان الليبي في هجومه: "هو حضرتك بجد فاكر إن حميد هو اللي بوظ المزيكا في مصر؟!؟!؟، المقسوم اللي حضرتك بتتكلم عليه هو الواكل بقاله 30 سنة مع كل الفنانين وهو سر الاستمرارية والنجاح، مفيش ألبوم بينزل غير ومقسوم الكابو رانن في الودن، لما مذيع صابغ شعره أبيض وفي اللفة يسألك سؤال زي ده، والمفروض ردك يبقى تربوي قبل الفني أنه إزاي يسأل السؤال بالطريقة دي لكن حضرتك كنت هتطير من الفرحة عشان السؤال في تقليل للكابو".
واختتم نديم الشاعري حديثه، قائلا: "حاول يا أستاذ حلمي تكسب الناس عشان الدنيا فانية، متبقاش خسران السيرة الطيبة وكمان الناس".