أعلن الفنان المصري، شريف إدريس، اعتزاله الفن نهائيا، وبحثه عن فرصة عمل خارج مصر، بسبب الظروف المادية الصعبة التي يمر بها هذه الأيام.
وقال إدريس عبر منشور له عبر فيسبوك: "بعد 35 سنة سعي وتعب وشقى في الوسط الفني قررت الاعتزال والابتعاد تماما وتغيير مسار حياتي وأي حد عنده فرصة سفر ليا هاكون شاكر ليه وده طلبي الوحيد.. وده قرار أخدته بعد ما الأمور وصلتفي الوسط الفني لمرحله عبثية وصلت أني بقيت بشوف بعض الزملاء بيشحتو الشغل علني علشان يشتغلو لان الشغل بقي متقسم على ناس معينه، فلو الأمور وصلت لكده ابعد أحسن".
وأضاف: "حتى لما بيجي شغل بيتفرض عليك توافق باقل الفلوس وتخرج من الشغل مديون.. ومواقف مهينة زي أن شركة إنتاج تعرض عليك أجر هو قيمة ربع أجرك والسبب أن الميزانية مصروفة على الديكور، طب خلو الديكور يمثل هحكيلكم موقف حصل معايا من اسبوع".
وتابع في منشور اعتزاله: "اتصل بيا حد قالي عايزين حضرتك بكره عندك تصوير في مسلسل كذا بس هتدفع عشره في الميه للكاستينج دايريكتور..كان هيجيلي جلطة بعد ما قفلت المكالمة ووافقت علشان انا محتاج اشتغل ومحتاج فلوس..وماقدرتش استوعب الفكره بصراحة إني بعد العمر ده مضطر ادفع علشان اشتغل فاتصلت واعتذرت، وده الحال حاليا أن الامور بقت في ايد كاستينج دايريكتور".
وطلب شريف ادريس المساعدة قائلا: "وصلت لمرحلة نفسية ومادية إني بقيت مش قادر اربيهم ولا أصرف عليهم وأنا عندي تلات أطفال..وبقيت مديون لطوب الارض حقيقي لو حد عنده فرصة سفر ليا هاكون شاكر له جداً وهيكون جميل في رقبتي لحد ما اموت لأن حقيقي انا مش قادر اعيش".
وأوضح الفنان المصري: "حاولت اسعى في أي مجال تاني بس ماقدرتش وحقيقي لو اتعرض عليا بطولات بعد البوست ده هرفضها لأن البوست ده هو نهاية علاقتي بالمجال اللي اتربيت فيه ودرسته وعشت فيه كل تفاصيل حياتي والحمدلله على كل شيء همسح ابلكيشن فيسبوك من تليفوني لاني هنزل ابيع تليفوني اصلا..فانا هاكون متاح اونلاين لحد بالليل".
واختتم منشوره قائلا: "لو حد عنده فرصة شغل وسفر ليا ومش معاه رقمي ياريت يجيبه من أي حد ملحوظة أنا مش محتاج طبطبة من حد أنا محتاج فرصة سفر وشغل تخليني أعيش ولادي حياه كريمة وبس شكرا ليكم محبتي للجميع".
يذكر أن الفنان المصري شريف إدريس شارك خلال مسيرته الفنية التي بدأت في منتصف الثمانينيات بأكثر من 70 عملا فنيا، وتحديدا أثناء فترة طفولته، حيث شارك في بطولة فيلم "الاتحاد النسائي" مع الفنانة مديحة كامل والفنان أحمد مظهر، وشارك كذلك في بطولة مسلسل "رأفت الهجان"، حيث قدم شخصية الطفل "طارق" مع الفنان محمود عبدالعزيز، كما شارك في بطولة مسلسل "أربيسك" مع الفنان صلاح السعدني".
وقدم شخصية الطفل "أيمن حسن النعمان"، وتعاون كذلك مع الفنان عادل إمام في مسرحية "بودي جارد"، وقدم أكثر من عمل خلال الفترة الماضية، كان آخرها مسلسل "قصر النيل" مع الفنانة دينا الشربيني.