قرّرتْ الفنانة المصرية، شيرين عبدالوهاب، أن تردّ على جميع الاتّهامات، التي وُجّهتْ لها من قبل البعض، بشأن تعمّدها تأخير طرح ألبومها الجديد لهذا الوقت، لكي تحارب النّجم عمرو دياب، وتنافسه. مؤكّدة، أنّها من المستحيل أنْ تفعل ذلك، لأنّه لا يصحّ المقارنة بينهما بأيّ حال من الأحوال، لأنّ تاريخه الفنّي، أكبر من تاريخها.

ووجّهتْ شيرين، رسالة لجمهورها، عبر تصريحات إذاعية قائلة: "خلونا نفرح وبلاش تنكدوا علينا بالمقارنات اللي عمري ما هسعى ليها.. في فانز كانوا بيتخانقوا معانا تقريبًا وشتمونا عشان التأخير يعني مش ممكن أكون مأخرة ألبومي وكليباتي عشان أحارب فنان كبير جدًا وفي مكان لوحده.. وأنا ألبومي لما يخلص هينزل على طول إن شاء الله وقبل ما شهر أكتوبر يخلص حيكون في السوق".

وتابعتْ: "أرجوكم ما تحطونيش في مقارنه مع حد أنا ست بسيطة وربنا بيكرمني وعارفه مقداري كويس وأنا مش بقارن نفسي مع أي حد حتى لو بيسبقني بيوم واحد نجاح فقط".

وأضافتْ شيرين: "أرجوكم ما تقارنوش بيننا لأن أنا في حتة وهو في حتة، وهو فنان كبير جدًا.. مش عايزة الناس دايمًا تقول إنه فيه حرب والله العظيم ما فيش حرب، أنا بتمنى لكل الفنانين الخير والنجاح سواء كان عمرو دياب أو تامر حسني أو أنغام".

واستطردتْ: "أنا عايزة أقول رسالة صغيرة لكل الناس اللي حطه اسمي جنب اسم فنان كبير بيسبقني بسنوات كتير، زي ما أنا بتعب وأتمنى إني في يوم لما أعجز أو أبطل أغني، إن محدش ييجي مكاني أيا كان أو الناس تقارني بيه.. أكيد مشواري غير مشوار أي حد ومشوار الفنان الكبير عمرو دياب غير أي حد".