كشفت الفنانة السورية جومانا مراد، سر غيابها عن فعاليات مهرجان القاهرة السينمائي في دورته الـ42، حيث لم تظهر سوى في حفلي الافتتاح والختام فقط.
وقالت جومانا في تصريحات لـ"فوشيا": "للأسف بعد الافتتاح تعبت، وكنت عيانة، وده أول ظهور ليا بعد الافتتاح، وكان نفسي أحضر فيلم النجمة إلهام شاهين، وهي عاملة فيه دور هايل وده أكيد مش غريب عليها".
وأضافت الفنانة السورية: "إن شاء الله هتشوفوني في رمضان الجاي بمسلسل جديد، بس مش هقول أي تفاصيل دلوقتي".
وتابعت: "عندي عروض سينما، وعملت فيلم سينما بس لسة منزلش اللي هو "يوم 13" مع شركة أوسكار، بس وضع الكورونا سبب تأجيل الفيلم، والفيلم متكلف كتير لإنه أول عمل 3D في مصر".
ومن جانبه علق زوج الفنانة جومانا مراد، على تألق زوجته في رمضان الماضي، من خلال مسلسل "خيانة عهد"، قائلًا: "أنا شهادتي فيها مجروحة، في خيانة عهد أبهرت الجمهور وأنا واحد من معجبيها وأقولها ربي يعطيكي ليرضيكي".
فيما وجهت مراد، رسالة إلى زوجها قائلة في ختام حديثها: "ربنا يخليك ليا يا رب ونفضل مع بعض ومع ولادنا ويخليهم لينا".
وكانت جومانا مراد قد كشفت عن معاناتها مع الأمومة، بعد ولادتها منذ عدة أشهر، لطفليها التوأمين، مشيرة إلى أن التربية صعبة ومسؤولية كبيرة.
وقالت جومانا في لقاء خاص مع موقع "فوشيا"، على هامش حفل تكريم نقيب الممثلين المصري أشرف زكي: "يمكن أكون تألقت في مسلسل خيانة عهد بدافع مشاعر الأمومة اللي كانت جوايا، لإني كنت حامل وأنا بصور، والله مش عارفة، احتمال يكون ده صح فعلا".
وأضافت: "أكيد الأمومة بتطلع حاجات كتير حلوة، وبتخليكي برده تشدي في شعرك كمان، صعب جدًا الجمع بين التربية والعمل، وخاصة لما تكوني فنانة".
وتابعت الفنانة السورية حديثها، قائلة: "الأمومة أحلى حاجة في الدنيا، ربنا ما يحرم حد منها، وربنا يحفظ ولاد الناس كلها".
وأكملت: "وأنا بجهز وبستعد لأي شغل عندي، لما بسمع صوت أولادي في الخلفية بيعيطوا كده، قلبي بيتقطع ببقى عاوزة أسيب كل حاجة وأفضل معاهم وأحضنهم، بس إحنا عندنا شغلنا، وربنا يقدرنا ونقدر نربيهم صح لإنها مسؤولية صعبة".