أبدى الفنان المصري أحمد تهامي، سعادته بالمشاركة في بطولة فيلم "زنزانة 7"، لافتًا إلى أنه وفريق العمل عانوا كثيرًا في التحضيرات التي سبقت التصوير.
وقال تهامي في لقاء مع "فوشيا": "فيلم يستحق العناء والتعب، بقالنا فترة كبيرة شغالين فيه، التحضيرات كانت طويلة وكتيرة والتجهيزات كانت مرهقة، لإن في أكشن كتير وأماكن التصوير متعددة".
وأضاف: "المخرج إبرام نشأت عامل فيلم حلو أوي، وهيبقى من أهم المخرجين، والمنتجين لم يبخلوا بأي شيء، صورنا في أكتر من لوكيشن داخل القاهرة وفي سهل حشيش".
وتابع: "الفيلم بطولة مجموعة كبيرة من الفنانين، نضال الشافعي ومايا نصري وأحمد زاهر ومنة فضالي وكوكبة من الفنانين، وسعداء بالشغل مع بعض لأننا أصدقاء وأصحاب وعشرة عمر،، اشتغلت مع نضال ومنة فضالي قبل كده، وأنا وأحمد زاهر عشرة عمر".
وعن دوره في الفيلم، قال تهامي: "أكيد لازم هستغل جسمي وبنياني القوي، زي أفلام الحركة برة في أمريكا وأعمال فان ديزل على سبيل المثال وذا روك".
وواصل: "الشخصية اسمها مطحنة، لو شوفتيه هتبقي عاوزة تولعي فيه، هو مطحنة بشكله ومشيته وكلامه وهو الي يعمل تغيير في الأحداث ككل، الشخصية صعبة والناس شافت بس صور من الفيلم نشرتها على السوشال ميديا، وأنا فرحان بتعليقاتهم وردود أفعالهم رغم إنها حاجات بسيطة متحرقش الأحداث لإن اللي جوة الفيلم أكبر بكتير".
واستطرد الفنان المصري الشاب: "معظم الوقت الناس يقولولي إنت (بيبي فيس) وإزاي تعمل شر، بس لما ابتديت أنزل صور على السوشيال ميديا من التصوير والناس ابتدوا يشوفوا الشخصية والدور، لمست مدى تشوق الجمهور للعمل ومشاهدته".
وعن أزمة فيروس كورونا، قال أحمد: "فقدنا ناس غاليين علينا جدًا، سواء داخل الوسط وآخرهم الأستاذة رجاء الجداوي، أو من الأصدقاء والأسر، فعلا موضوع صعب وكبير جدًا ومش مستحمل إننا نتهاون في القصة دي خالص لا في بيوتنا ولا في المجتمع بشكل عام".
وأكمل حديثه قائلًا: "في قيود والتزامات تجبرنا على الالتزام بيها، العالم كله حصل فيه نفس مشكلة كورونا والظروف اللي حصلت في مصر، مبقناش عارفين إيه الموضوع، شوية كبير وشوية صغير".
وعن إيجابيات فيروس كورونا، قال: "ابتديت أشوف أسرتي وأولادي أكتر من الأول، ولكن من السلبيات إني تخنت طبعًا لإن الواحد مش لاقي حاجة يعملها، والتمرين في البيت حلو بس مش هيبقى مفيد أوي بالنسبة لي".
واختتم بالحديث عن نجله قائلًا: "ابني طالع شكلي وأنا كبير وواخد شخصيتي وأنا كبير، واخد كل حاجة مني وأنا كبير مش وأنا صغير".